د کرېکټ له ۱۹ کالو کم عمره لوبډله د بنګلهدېش او هندوستان لوبډلو له ماتولو او د اتلولۍ له جامونو ګټلو وروسته هېواد ته راستنه شوه.
دا لوبډله هند او بنګلهدېش لوبډلو ته له ماتو ورکولو وروسته د سېشنبې په سهار هېواد ته راستنه او تود هرکلی يې وشو.
د تنکیو ځوانانو دې لوبډلې د بنګلهدېش له لوبډلې سره د پنځوس اورونو ۵ سیالۍ درلودې چې په لوړ توپیر یې د ۲ سیالیو له ګټلو سره دا سیریز په خپل نوم کړ، حال دا چې وروستۍ لوبه يې د باران له امله لغو شوه.
له ۱۹کالو کم عمره لوبډلې له بنګلادېش وروسته هند ته سفر وکړ او هلته یې هم خپلې هندۍ سیالې لوبډلې ته د پنځوس اورونو سیالیو د پنځه لوبو سیریز کې درې د یو پر وړاندې توپیر سره د دې سریز جام هم په خپل نوم کړ.
د ۱۹ کالو کم عمره لوبډلې روزنکي بیا په خپلو خبرو کې بنګلهدېش او هندوستان ته د دوی دا سفر بریالی او له لاسته راوړنو ډک وباله او دا باور یې څرګند کړ چې د لوبو د روانې سطحې په ساتلو سره به د نورو سیالو ډلو په وړاندې هم ښه وځلېږي.
له ۱۹کالو کم عمره ملي لوبډلې روزونکې رییس احمدزی وايي: « د هند الف لوبډله او د هند A او B لوبډلې چې د هند د کرېکټ ټول غوره لوبغاړي په کې راټول شوي وو او ټاکل شوې وه چې له همدې لوبډلې بیا سکواډ جوړ کړي، زموږ لوبډلې ترې ۳ لوبې وګټلې. همدارنګه زموږ لوبډلې له بنګلهدېش څخه دوه لوبې وګټلې.»
په ورته مهال، لوبغاړي وايي چې له هند او بنګلهدېش سره له دغو سریزونو ګټلو وروسته ډاډه دي چې له نولس کالو کم عمره لوبډلو په راتلونکو آسیايي او نړیوال جام کې به هم ښه وځلېږي.
له ۱۹ کالو کم عمره ملي لوبډلې لوبډلمشر تسکین محبوب وايي: « زه د خپلو لوبغاړو محنت او د دوی کارکردګي او دغه راز له موږ سره په کور دننه او بهر کې شوي کار ته په کتو، ویلی شم چې په آسیا جام کې به هم ښه وځلېږو.»
له ۱۹کالو کم عمره ملي لوبډلې لوبغاړی عبدالعزیز وايي: « موږ د آسیا جام لپاره پوره چمتوالی لرو. بنګلهدېش او هند ته په خپلو کورونو کې ماتې ورکولو موږ ته پرځان باور راکوي او له همدې امله به آسیا جام او نړیوال جام کې ښې لوبې ولرو.»
د همدې لوبډلې بل لوبغاړی فیصل وايي: « دا بریاوې موږ ته د آسیا جام او نړیوال جام لوبو لپاره ډېر اعتماد او باور راکوي او ډاډه یو چې ښې لوبې به وکړو.»
ټاکل شوې د روانې ډسمبر په ۱۲د کرېکټ له ۱۹ کالو کم عمره لوبډلو آسیا جام سیالۍ په متحده عربي اماراتو کې پیل شي او د همدې میاشتې تر۲۱ نیټې به دوام وکړي. افغانستان به د کرېکټ له آسیايي شورا سره په ګډه د دې لوبو کوربه توب پر غاړه ولري.
