کرېکټ بورډ د افغانستان کرېکټ غوره لیګ(اېپياېل) سیالیو د وخت او ځای اعلان وکړ.
د کرېکټ بورډ چارواکي وايي، د شل اوریز غوره لیګ سیالۍ به د راتلونکي ۲۰۲۶ زېږدیز کال په وروستيو کې په متحده عرب اماراتو کې ترسره شي.
د افغانستان غور لیګ د سیالیو د وخت او ځای اعلان په اړه په عربي اماراتو کې یوه غونډه هم رابلل شوې وه چې د افغان لوبغاړو ترڅنګ په کې ګڼ شمېر ملي او نړیوالو سوداګرو ګډون کړی و.
یادې غونډې ته د کرېکټ بورډ اجراییوي ریيس ويلي، اېپياېل کې به د پخوا په څېر پنځه لوبډلې ګډون ولري.
د کرېکټ بورډ اجراییه ریيس نصیبخان وايي: « دا لوبې به په متحده عربي اماراتو کې د ۲۰۲۶ کال په وروستۍ ربع کې د پنځو ټیمونو په ګډون ترسره شي. د ټیمونو نومونه هماغه پخواني دي، خو هر شرکت چې دا ټيمونه پېري، کولی شي خپل نوم ورسره زیات کړي.»
د کرېکټ بورډ ریيس بيا د افغانستان کرېکټ غوره لیګ سیالیو بیا پیلېدل یوه ستره، مهمه او عایداتي پروژه بولي او زياتوي چې له هر اړخه د افغانستان په ګټه ده.
د کرېکټ بورډ ریيس میرویس اشرف وايي: « دا یوه ستره او بنسټیزه پروژه ده او زه ورته ډېر خوشاله یم. د دې عواید به کرېکټ بورډ او افغانستان ته راځي او دغه راز به لوبغاړو ته هم ډېره ګټه ولري.»
د کرېکټ ملي لوبغاړي د افغانستان غوره لیګ بیا پیلېدل د هېواد د کرېکټ غوړیدا لپاره یو مهم پړاو بولي او وایي، د دې لیګ په پیلېدو سره به ګڼ شمېر نوي لوبغاړي خپلې وړتیاوې افغانستان او نړۍ ته وښیي.
د کرېکټ پنځوس اوریزو لوبو لوبډلمشرحشمت الله شهیدي وايي: « زه تمه لرم چې له دا ځل اېپياېل څخه به هم ډېر ځوان لوبغاړي ملي ټیم ته راشي او بیا د افغانستان لپاره لوبې کوي.»
همدارنګه کرېکټ بورډ د افغانستان غوره لیګ سیالیو لپاره نوی نښان یا لوګو هم نندارې ته وړاندې کړه.
ملي لوبغاړي وایي، د ځوانو لوبغاړو لپاره به دا سیالۍ ځکه ګټورې وي چې تجربې به یې ورسره ښې شي او په کور دننه او نړیواله کچه به یې د پرمختګ لپاره لار هواره شي.
د شل اوریزې ملي لوبډلې لوبډلمشر راشدخان وايي: « دا ډېره ښه خبره ده چې د افغانستان غوره لیګ یوځل بیا پیل کېږي. دا نه یوازې د ملي ټیم بلکې د هغو لوبغاړو لپاره هم یو ښه فرصت دی چې افغانستان کې دي. هغوی به دلته د نړۍ له لوبغاړو سره ولوبېږي او زده کړه به کوي. دا د افغانستان د کرېکټ بورډ لپاره هم ډېره ښه سټېج دی.»
له دې مخکې کرېکټ بورډ د روانې ډسمبر میاشتې پر نهمه نېټه په یوه اعلامیه کې ویلي و چې د افغانستان غوره لیګ د پیل لپاره مراسم به د ۲۰۲۵ کال د ډسمبر میاشتې په ۲۰مه نېټه په متحده عربي اماراتو کې ترسره شي. کرېکټ بورډ دا هم ویلي و چې د ایټيډبلیو- ټيجي په نامه شرکت ته یې په دې ليګ کې د پانګونې حق ورکړی.
له دې مخکې په پام کې وه چې د افغانستان غوره لیګ سیالیو ترسره کېدو ځای او پیل نېټې په هکله په تېره اګست میاشت کې اعلان وشي، خو د کرېکټ بورډ مسوولینو په خبره، د اداري چارو او تخنیکي ارزونو له امله دغه څه تر ډسمبر پورې وځنډېدل.
ملي لوبغاړی رحمت شاه زرمتی وايي: « دا لیګ له مالي پلوه هم د کرېکټ بورډ او هم د لوبغاړو لپاره دېر ښه دی. همدارنګه د کورني کرېکټ لوبغاړو ته به له ملي او نړیوالو لوبغاړو سره د لوبېدو چانس برابر شي او ورسره به د افغانستان کرېکټ پرمختګ وکړي.»
افغانستان کرېکټ غوره لیګ د شل اوریزو سیالیو سوداګریز لیګ دی چې د تنظیم او مدیریت چارې یې د افغانستان کرېکټ بورډ مخته وړي.
د دغو سیالیو لومړی پړاو په ۲۰۱۸م کال ترسره شو چې په کې پنځو لوبډلو ګډون درلود او اتلولي يې د بلخ لیجنډز لوبډلې د کابل ځوانان لوبډلې ته د ماتې په ورکولو سره ګټلې وه.
په ۲۰۱۹ کال کې بیا د افغانستان کرېکټ بورډ د ځینو ښکېلو شرکتونو په مالي مسایلو کې د روڼتیا نه شتوالي له تورونو سره د دې سیالیو ځنډېدو خبره کړې وه. د کرېکټ نړیوالې شورا ایسيسي د افغانستان د کرېکټ غوره لیګ په ۲۰۱۸ کال کې په رسمیت وپېژانده.
