<h2>په پکتیا کې د ۳۶ رسمي کلبونو ترمنځ د کرېکټ یو ورځنۍ سیالۍ پېل شوې. دغه سیالۍ هر کال د هېواد په ټولو ولایتونو کې د افغانستان کرېکټ بورډ له لوري ترسره کېږي.</h2> <br> <h2>د تنظیموونکو په وینا، د دغو سیالیو له لارې دوی هڅه کوي چې د بېلابېلو سیمو ځوانو لوبغاړو ته د خپلې وړتیا ښودلو زمینه برابره کړي.</h2> <br> <h2>مسوولین وایي، د یادو سیالیو په مرسته به تکړه او ځلېدونکي لوبغاړي د وزیر محمد اکبرخان دویمې درجې ولایتي سیالیو لپاره غوره شي.</h2><br> <h2><strong>د پکتیا کرېکټ ولایتي </strong><strong>آ</strong><strong>مر میرویس امان</strong><strong> وايي: « ټولې ۳۶ لوبډلې دي چې د دوی ترمنځ به ۳ میاشتې لوبې کېږي او بیا به پایلوبه کوي. له دغو لوبډلو به ۴۰ غوره لوبغاړي انتخابوو او بیا به ورته روزنیز کمپونه جوړوو. دا سیالۍ د لوبغاړو لپاره ډېرې مهمې دي، ځکه له همدې لوبغاړو د وزیر محمد اکبرخان لوبو ته لوبغاړي ټاکل کېږي.» </strong></h2> <strong><br></strong> <h2>اخوا د کرېکټ لوبغاړي هم دا ډول سیالۍ د کرېکټ د ودې لپاره مهمې بولي او زیاتوي، په ولایتي کچه د منظم کورني کرېکټ ترسره کېدل کولی شي د استعدادونو په موندنه او د مسلکي لوبغاړو په روزنه کې مهم رول ولوبوي.</h2> <br> <h2><strong>لوبغاړ</strong><strong>ی</strong><strong> رحمان زرمتی</strong><strong> وايي: « دا سیالۍ د هغو لوبغاړو د استعداد څرګندولو لپاره فرصت دی چې په ولایتونو کې پټ پاتې دي. دوی باید دلته ځان ثابت کړي، ترڅو وړاندې لاړ شي.»</strong></h2> <strong><br></strong> <h2><strong>لوبغاړی</strong><strong> رف</strong><strong>ې</strong><strong>ع صادق</strong><strong> وايي: « هر لوبغاړی باید زحمت وباسي او ځان ثابت کړي، ترڅو مخکې کرېکټ لپاره چمتو شي.»</strong></h2> <strong><br></strong> <h2>په پکتیا کې د ۲۰۲۶ میلادي کال لپاره د ثبت شویو کلبونو ترمنځ دا سیالۍ داسې مهال پیل کېږي چې لاهم د دې ولایت د کرېکټ لوبغاړي د همدې لوبې د ودې لپاره د لوبغالو او روزنځایونو په برخه کې منظمې اسانتیاوې نه لري.</h2> <h2>شریک یې کړئ </h2>
