په داسې حال کې چې کوچني اختر ته د ګوتو په شمېر څو ورځې پاتې دي، یو شمېر دوکانداران د خپلو کاروبارونو له پیکه کېدو شکایت کوي.
عبدالوکیل چې په کابل کې د وچې مېوې هټۍ لري وایي، د ولس کمزوری اقتصاد او د اختریزو توکو د بیو لوړوالی د دې لامل شوی چې خلک يې د اخیستلو وس ونه لري.
عبدالوکیل په دې اړه وايي: « د اختر مخه ده او سودا مو زیاته راوړې، خو د پخوا په څېر بازار نه شته. د خلکو اقتصاد ضعیفه شوی او پیسې نه لري؛ ځکه خو زموږ خرید او فروش هم کم شوی. که څه هم د اختر مخه کې بازار یو څه ښه شوی، خو بیې ډېرې لوړې دي او د تېر کال پرتله ۵۰ تر ۷۰ افغانیو زیاتوالی راغلی.»
په همدې حال کې یو شمېر نور هټۍ وال وايي، د بشري مرستو بندېدل او د کاري فرصتونو نه شتوالی د دې لامل شوي چې د دوی کاروبار د تېرو کلونو پرتله کمرنګه شي.
د لیلامي بوټانو پلورونکی سلطان وايي: « خلک د بوټانو اخیستلو وس نه لري، داسې چې د۱۰۰ افغانیو بوټان په ۵۰ غواړي، د ۵۰۰ بوټ په ۱۰۰ افغانیو غواړي. خلک پیسې نه لري، تېر کال بیا هم ښه و، سږ کال بیخې بازار ضعیف دی.»
پلورونکی نور عباس وايي: « د خلکو اقتصاد کمزوری دی، چا سره پیسې نه شته. اوس هغسې کارونه نه شته لکه مخکې چې وو. له حکومت غوښتنه کوو چې خلکو ته د کار زمینه برابره کړي.»
د کابل یو شمېر اوسېدونکي له سرپرست حکومته غواړي چې نرخونه کنټرول او د هېواد پر کچه د کاري فرصتونو زمینه برابره کړي.
د کابل ښار یو تن اوسېدونکی رحمان الله وايي: « بازار ته راغلم ترڅو اختر لپاره وچه مېوه واخلم، خو وینم چې بیې د تېر کال پرتله لوړې شوې دي. زه هغه سودا اوس نه شم کولی چې پخوا مې کوله. مجبور یم نیمايي سودا واخلم، ځکه په ټوله مې وس نه رسېږي.»
د کابل ښار یو بل اوسېدونکی احمد وايي:« له حکومت مو غوښتنه دا ده چې خلکو ته کاري زمینه برابره کړي. که زه معاش یا کار ولرم، له ما سره به د دوکاندار کار هم وچلېږي.»
دا په داسې حال کې ده چې په تېرو کلونو کې د اختر په رارسېدو سره بازارونه د سږ کال پرتله ډېر فعال وو. هېوادوال د دې حالت لامل کمزوری اقتصاد او د کاري فرصتونو نه شتوالی ګڼي.
