په ننګرهار ولایت کې د ۲۰ میلیونه افغانیو په لګښت د درمل جوړولو یوې بلې کارخونې هم په فعالیت پيل کړی.
د کارخونې مسوولین وايي، د ۲۵ قلمه درملو په جوړولو سره په دې بریالي شوي چې لسګونه کسانو ته د کار زمینه برابره کړي او له ننګرهار سربېره، نورو ولایتونو ته هم درمل واستوي.
د درمل جوړولو کارخونې مشر نوید مسکینزی وايي: « په دې کارخونه مې ۲۰ میلیونه افغانۍ پانګونه کړې او له ۲۵ تر ۳۰ قلمه درمل تولیدوو. په دې کارخونه کې له ۴۰ تر ۵۰ تنو پر کار بوخت دي. زموږ درمل د افغانستان ټولو ولایتونو ته استول کېږي.»
په دغه کارخونه کې په مستقیم او غیر مستقم ډول شاخوا ۵۰ تنه پر کار بوخت دي او خوښ دي چې په هېواد دننه ورته د کار کولو زمینه برابره شوې ده.
کاریګر د صنعتي کارخونو جوړول له هېواد د کډوالۍ د مخنیوي لپاره مهم بولي او ټینګار کوي چې دا ډول کارخونې دې لا زیاتې شي.
د درمل جوړولو کارخونې یو تن کاریګر وايي: « په دې کارخونه کې د ګڼو کسانو لپاره د کار زمینه برابره ده. موږ له نورو ملي سوداګرو هم غوښتنه کوو چې هېواد کې پانګونه وکړي؛ ترڅو د فکري استعدادونو د وتلو مخه ونیول شي.»
د کارخونې یو تن بل کاریګر هم ورته غوښتنه لري او وايي: « له ملي سوداګرو غوښتنه کوو چې په هېواد کې پانګونه وکړي او خلکو ته د کار زمینه برابره کړي.»
له دې سره، د عامې روغتيا وزارت ځايي مسوولین وايي، اوس مهال په ننګرهار کې د درمل جوړولو ۷ کارخونې فعالې دي چې دوی ترې وخت پر وخت څارنه کوي.
د دوی په خبره، د يادو کارخونو په وسيله توليد شوي درمل بازار ته له وړاندې کېدو مخکې د کيفيت له پلوه په لابراتوار کې معاینه او کتل کېږي.
د ننګرهارعامې روغتيا رياست د خوړو او درملو څانګې د درملیزو خدمتونو آمر اول ګل خادم وايي:« ننګرهار کې په رسمي ډول ۷ کارخونې فعالیت لري. موږ د دوی له جوړو درملو څارنه کوو. هرځل چې نوي درمل تولید شي، تر هغو قرنټین وي او بازار ته نه پرېښودل کېږي چې له مرکزي لابراتوار څخه یې مثبته پایله نه وي راغلې.»
د درمل جوړوونکو کارخونو مالکان ټینګار کوي، که په صنعتي پارک کې ورته مناسب ځای ورکړل شي او په کور دننه خام مواد برابر شي، کولی شي د توليد په زياتولو سره د افغانستان جوړ درمل بهر ته هم صادر کړي.
