د افغانستان دوو ملي لوبډلو فوټسال او کرېکټ په نړیوال سپورټي ډګر کې وروستۍ لاسته راوړنې د پام وړ بلل شوې.
د دغو دوو ملي لوبډلو لوبې په کور دننه او نړیوالو رسنیو کې مثبت غبرګونونه لرل او په پراخه کچه ستایل شوې دي.
د فوټسال ملي لوبډلې د نړیوال جام د ۱۶ غوره لوبډلو پړاو ته لار پیدا کړه او د افغانستان کرېکټ ملي لوبډلې بیا له سویلي افريقا د یو ورځینو سیالیو لوبلړۍ د ۲ـ۱ په توپير سره وګټله.
د فوټبال فډراسیون د خبر پر له مخې، د فوټسال نړیوال جام د ګروپي سیالیو پایلو وښوده چې افغان لوبډله د ښو امتیازیاتو لرلو له امله له (سي) ګروپ څخه د درېیمې لوبډلې په توګه بل پړاو ته لار پیدا کړه.
د فوټسال لوبې څارونکي په نړیوال جام سیالیو کې د افغانستان لوبې د پام وړ او حیرانوونکې بولي او وایي، د افغانستان فوټسال ملي لوبډلې هغه ډول لوبې وکړې چې نړۍ یې هم حیرانه کړه.
د فوټسال شنونکی مسرور تابش وايي: «دا ډېرې سختې لوبې دي او داسې پړاو ته رسېدلې چې ټیمونه له ټورنمنټ څخه حذف کېږي. ټاکل شوې په دې پړاو کې له پاراګوای سره لوبه ولرو؛ موږ موده وړاندې په یوه دوستانه لوبه کې د دې هېواد لوبډله ماته کړه او اوس هم د دې وړتیا لرو چې په رسمي لوبه کې یې هم ماته کړو، خو په ورزش کې د هره څه امکان شته. زموږ ټیم بشپړ چمتوالی لري او که بل پړاو ته لار پیدا کړي، ښايي له فرانسې یا ټایلنډ سره مخامخ شو.»
افغانستان په ګروپي پړاو کې یوازې یوه سیالۍ ګټلې او دوه نورې یې بایللې دي. اټکل کېږي د ۱۶ غوره لوبډلو په پړاو کې د افغانستان فوټسال ملي لوبډله له پارګوای سره مخامخ شي.
دغه سیالۍ به د سپټمبر میاشتې په ۲۵مه نېټه د ازبېکستان په کوربه توب ترسره شي.
په ورته مهال، د افغانستان کرېکټ ملي لوبډلې په یوه تاریخي بريا کې له سویلي افریقا د یو ورځینو سیالیو لوبلړۍ وګټله.
که څه هم د سویلي افریقا د کرېکټ ملي لوبډلې د درې یو ورځنیو سیالیو د لوبلړۍ په وروستۍ سيالۍ کې د ۷ وېکټو په توپیر افغانستان ته ماتې ورکړه، خو لوبلړۍ له وخت وړاندې ۲ـ۱ افغانستان ګټلې وه.
د افغانستان کرېکټ بورډ د سویلي افریقا پر وړاندې د افغانستان بریاوې د پام وړ بولي او زیاتوي، دا ډول لاسته راوړنې به د افغانستان کرېکټ لا وغوړوي.
د کرېکټ بورډ ویاند سید نسیم سادات وايي: « دا او دېته ورته بریاوې د افغانستان پر ملي لوبډله او کورني کرېکټ ډېر مثبت اغېز لري. ځوانان مسلکي کرېکټ ته هڅول کېږي. ترڅو په نړیوالو ډګرونو کې د افغانستان استازیتوب وکړي.»
که څه هم افغانستان له سوېلي افریقا دوې پرله پسې لوبې وګټلې خو د تېرې جمعې ورځې لوبه یې د ۱۷۷ منډو په توپیر وګټله چې د سویلي افریقا خلاف تاریخي بریا بلل کېږي.
