د سپورټ برخه کې د پرمختګ نوی ګام! د لوبغاړو له پرله پسې غوښتنو وروسته، په اساسي ډول د بلخ کرېکټ لوبغالي جوړولو چارې پیل شوې.
د بلخ کرېکټ آمریت مسوولان وایي، د افغانستان کرېکټ بورډ ادارې له خوا د دې لوبغالي اساسي جوړېدو لپاره ۴.۴ میلیونه افغانۍ ځانګړې شوې دي او رغنیزې چارې یې د یوه قراردادي شرکت له خوا پرمخ وړل کېږي. د پروژې مسوول چارواکي وایي، د قرارداد له اصولو سره سم به د څلور میاشتو موده کې یادې رغنیزې چارې بشپړې شي.
د بلخ کرېکټ آمر محمدالله ثابت وايي: « لکه څرنګه چې تاسو ته معلومات شته، څه موده مخکې د کرېکټ اکاډمۍ جوړولو پروژه هم پيل شوه او دا مهال یې کارونه ۹۰ سلنه بشپړ شوي او راتلونکو څو ورځو کې به ګټه اخیستنې ته وسپارل شي. اوس دا دی چې د کرېکټ لوبغالي جوړولو چارې هم پيل شوې چې په کې د لوبغالي چمن زرغونول او د اوبو سیسټم شامل دي چې ورسر به د بلخ کرېکټ ډېر پرمختګ وکړي.»
د پروژې مسوول امین الله مراد وايي: « دا لوبغالی په ۱۲۰ کاري ورځو کې د ۴.۴ میلیونه افغانیو په ارزښت جوړېږي. په دې پروژه کې د لوبغالي هوارول، د اوبو څاه، د چمن زرغونول، کانالیزاسیون او د ویشتنځای یا پيچ جوړول شامل دي.»
په ورته مهال، د بلخ یو شمېر کرېکټ لوبغاړي د کرېکټ بورډ دا ګام د کرېکټ برخې پیاوړتیا او پرمختګ لپاره مهم بولي او زیاتوي، په دې سره به وکولی شي د بلخ ولایت، شمال زون او هېواد په کچه ښې لاسته راوړنې ولري.
کرېکټ لوبغاړی عتیق الله همدرد وايي: « موږ له کرېکټ بورډ مننه کوو چې د لوبغالي د جوړولو کارونه یې پیل کړل، دا به د بلخ ولایت کرېکټرانو ته لوی سهولت شي.»
د کرېکټ یو بل لوبغاړی محمد وايي: « زموږ لوبغالی ډېرې ستونزې لري، خو له دې پروژې سره به څه نا څه راکمې شي.»
لوبغاړی محمد یوسف وايي: « څومره چې سهولتونه ډېر وي، لوبغاړي ښه او ژر پرمختګ کولی شي. له کرېکټ بورډ څخه د دې پروژې د پيل کولو لپاره مننه کوو. د دې لوبغالي په شنه کېدو سره به بلخ او آمو زون کې ښه لوبغاړي و روزل شي.»
د کرېکټ بورډ ادارې مسوولان بیا په ټولو ولایتونو کې د لوبغاړو ستونزو ته د رسېدو ډاډ ورکوي. دوی وایي، له بلخ سربېره تخار، کندز، بغلان او نورو شمالي ولایتونو کې یې هم لوبغاړو ته د سهولتونو برابرولو هڅې پیل کړې دي.
د کرېکټ بورډ استازی ننګیالی حبیبي وايي: « کرېکټ بورډ سږ کال آمو زون ته ځانګړې پاملرنه لري. له دې لوبغالي سربېره کندز کې هم کارونه روان دي او تر ډېره بشپړ شوي. تاسو ولیدل چې سږ کال کندز لوبغالي کې لوبې هم وشوې. په بغلان ولایت کې هم پر اکاډمۍ او لوبغالي کار روان دی؛ دغه را تخار ولایت کې هم د اکاډمۍ پر جوړولو کار پيل شوی. د دې پروژو له بشپړېدو سره د آمو زون کرېکټ ډېره وده وکړي.»
د بلخ کرېکټ مسوولان داسې مهال په دې ولایت کې په بنسټیزه توګه د کرېکټ لوبغالي جوړلو خبر ورکوي چې له دې وړاندې هم په متحد کرېکټ لوبغالي کې د یو میلیون افغانیو په لګښت د مجهزې اکاډمۍ جوړېدو چارې پیل شوې وې او کارونه یې بشپړېدو ته نیږدې شوي دي.
چارواکي وايي، ډېر ژر به یې ګټه اخیستنې ته وسپاري.
