د افغانستان کرېکټ بورډ له لوري اسیا کپ کې د لوبېدو لپاره چې راتلونکې میاشت په متحده عرب اماراتو کې پیل کېږي، د راشد خان په لوبډلمشرۍ د افغان لوبغاړو ۱۷ کسیز نوملړ اعلان شو.
په دې نوملړ کې راشد خان، رحمان الله ګربز، ابراهیم ځدراڼ، صدیق الله اتل، عظمت الله عمرزی، محمد نبي، ګلبدین نایب، دروېش رسولي، کریم جنت، شرف الدین اشرف، محمد اسحاق، مجیب ځدراڼ، الله محمد غضنفر، نور احمد لکڼوال، فضل الحق فاروقي، نوین الحق او فرید ملک شامل دي.
د افغانستان کرېکټ بورډ وايي، راتلونکي اسیا کپ لپاره اعلان شوې لوبډله له هراړخیز غور او دقت وروسته ټاکل شوې ده.
د افغانستان کرېکټ بورډ ویاند سید نسیم سادات وايي:« د راتلونکي اسیا جام لپاره د افغانستان ملي لوبډله اعلان شوه. په دې نوملړ کې ۱۷ تنه اصلي لوبغاړي او ۳ نور هم احتیاطي لوبغاړي شامل دي. باید ووایم، مخکې له دې چې دا لوبغاړي اسیا جام کې ګډون وکړي، دوی خپل پوره چمتوالی نیولی.»
د کرېکټ لوبې څارونکي هم راتلونکي اسیا کپ لپاره اعلان شوې افغان لوبډله له هر اړخه متوازنه بولي او باور لري چې دا لوبډله کولی شي د اسیا کپ تر پایلې لوبې ځان ورسوي.
د دوی په نظر، دا لوبډله د توپ وهوونکو، توپ اچوونکو او په کې د الرونډرانو د انتخاب له پلوه یوه ځواکمنه لوبډله ده چې په راتلونکي اسیا جام کې به د افغانستان لپاره ښې لاسته راوړنې ولري.
د کرېکټ څارونکی عبدالمالک شینواری وايي: « په دې لوبډله کې د کریم جنت، ګلبدین نایب او عظمت عمرزي په څېر ښه الرونډران او دغه راز د ورو توپ اچونې په برخه کې الله محمد غضنفر، راشد خان، نور احمد، مجیب ځدراڼ شامل؛ همدارنګه په تېزو توپ اچوونکو کې نوین الحق، فضل الحق او ګلبدین شامل دي. دا یوه ډېره غوره لوبډله ده او له دواړو پخوانیو تجربه لرونکو او ځوانو لوبغاړو جوړه ده. له بلې خوا، د توپ وهنې په برخه کې هم د رحمن الله ګربز او ابراهیم ځدراڼ په ګډون تکړه لوبغاړي شامل شي. موږ تمه لرو چې اسیا کپ کې به ښې لوبې ولرو او زموږ لوبډله به تر فاینل پورې ځي.»
په ورته وخت کې د افغانستان کرېکټ بورډ وايي، راتلونکي اسیا جام ته د چمتوالي په موخه یې افغان لوبډلې ته په متحده عربي اماراتو کې له پاکستان او متحده عرب اماراتو ټیمونو سره درې اړخیز سیریز برابر کړی چې د اسیا کپ له پیل یوه ورځ وړاندې به پای ته ورسېږي.
باور دا دی که په دې لوبلړۍ کې افغانستان خپلو مقابلو لوبډلو ته چې پاکستان او متحده عربي امارات دي، ماتې ورکړي؛ نو له لوړ مرال سره به اسیا کپ ته ورشي او پر نورو لوبډلو به فشار زیات وي.
د افغانستان کرېکټ بورډ ویاند سید نسیم سادات وايي: « له اسیا جام وړاندې به زموږ درې اړخیزه لوبلړۍ هم ترسره کېږي. په ټوله کې ډېره ښه چمتوالی نیول شوی او زموږ تمه شته چې افغان لوبډله به په راتلونکي شل اوریز اسیا جام کې ښې لوبې وکړي.»
د کرېکټ څارونکی عبدالمالک شینواری وايي: « له پاکستان او اماراتو سره درې اړخیز سریز هم شته او دا به د افغانستان د ټیم لپاره یو تمریناتي او ښه سریز وي؛ ځکه چې له هغه څو ورځې وروسته اسیا جام پیل کېږي. که په دې سریز کې افغانستان متحده عربي امارات او پاکستان مات کړي او دا سریز وګټي، نو اغېز به یې اسیا کپ کې پر نورو ټيمونو زیات وي.»
ټاکل شوې د راتلونکي سپټمبر میاشتې پر ۹ نېټه به د کرېکټ اسیا کپ لوبې پیل شي.
د ۲۰۲۵ کال اسیا کپ سیالیو کې د افغانستان په شمول ۸ لوبډلې، هندوستان، پاکستان، سريلانکا، بنګله دېش، متحده عربي امارت، عمان او هانګ کانګ لوبېږي چې افغانستان په بي ګروپ کې له سریلانکا، بنګله دېش او هانګ سره مخ دی او هند به بیا په اې ګروپ کې له پاکستان، عمان او متحده عربي اماراتو سره ولوبیږي.
