افغان لوبغاړو د اسلامي پیوستون په ورزشي سیالیو کې چې د سعودي عربستان په پلازمېنه ریاض کې په لاره اچول شوې وې، د سرو زرو، سپینو زرو او برونزو درې مډالونو په ګټلو سره هېواد ته ډک لاس راستانه شول.
د المپیک ملي کمېټې چارواکو او عامو خلکو یې د کابل په نړیوال هوايي ډګر کې تود هرکلی وکړ او د دوی د سپرلي موټر یې د المپیک ملي کمېټې تر ودانۍ پورې په ځانګړو مراسو بدرګه کړ.
محمد یوسف جهانګیر لومړی افغان لوبغاړی شو چې د موی تای لوبو کې یې د افغانستان لپاره د سرو زرو مډال په خپل نوم کړ. جهانګیر د افغانستان د موی تای ملي لوبډلې لوبډلمشر هم دی.
د سرو زرو مډال ګټونکی محمد یوسف جهانګیر وايي: « د دې مسابقاتو سطحه ډېره لوړه وه او ما په کې د انډونیزیا، عربستان او ترکیې له لوبغاړو سره لوبه وکړه او بریالی شوم چې د افغانستان لپاره د سرو زرو مډال واخلم.«
د اسلامي پیوستون له نړیوالو سیالیو څخه د تکواندو برخه کې هم افغان لوبغاړي مډال راوړی. حسین رضایي د رزمي سیالیو بل افغان لوبغاړی دی چې په دې لوبو کې یې د خپلو سیالانو په ماتولو سره د سپین زرو مډال راوړی.
د سپینو زرو مډال ګټونکی حسین رضایي وايي: « ډېر خوشاله یم چې چارواکي او خلک زموږ د هرکلي لپاره راغلي. زه هیله لرم موږ هم د دې مډالونو په راوړلو سره د خلکو زړه ګټلی وي.»
حکومتي چارواکي او د المپیک ملي کمېټې مسوولین، لوبغاړو او د هغوی کورنیو ته د مبارکۍ ویلو ترڅنګ د لوبغاړو د ملاتړ ډاډ ورکوي.
د المپیک ملي ادارې رییس احمدالله وثیق وايي: « زه یوځل بیا د ورزش ټولو مینه والو ته ژمنه ورکوم چې د ورزش اداره، د بدني روزنې عمومي ریاست او د المپیک ملي کمېټه د ورزشکارانو تر شا ولاړ دي او تل به د ستاسو ملاتړ کوي. موږ پر یوه منظم مکانیزم کارکوو، ترڅو د ورزش په ټولو برخو کې دا ډول مډالونه نور هم ډېر راوړو.»
د کورنیو چارو وزارت ویاند عبدالمتین قانع وايي: « د افغانستان اسلامي امارت ورزشکاران هڅوي او کله چې امنیت ټینګ وي او خلک هم د ورزشکارانو ملاتړ ته ادامه ورکړي، دا ویاړونه به ورځ تر بلې لا پسې ډېر شي.»
بله خوا، د رزمي سیالیو یوشمېر لوبغاړي او روزونکي وروستیو کې په نړیواله کچه د افغان لوبغاړو لاسته راوړنې د خپلې انګیزې لوړېدو او لا هڅونې لامل بولي. دوی وایي، هڅه کوي یوه ورځ دوی هم د نړیوالو افغان اتلانو په څېر نومونه خپل کړي.
د رزمي سیالیو روزونکی طاهر مبارز وايي: « دا د افغانستان د ټولو ورزشکارانو لپاره ویاړ دی. دا ویاړونه د هغه چا په نصیب وي چې ټینګ عزم لري او سخت کار کوي.»
د رزمي سیالیو لوبغاړی علي جان وايي: « له هېواد څخه بهر لوبې ترسره کول د هر ورزشکار لپاره تر تشویق دی او انګیزه ورکوي. موږ له چارواکو غواړو چې د بهرنیو سفرونو زمینه برابره کړي.»
د اسلامي پیوستون سیالۍ چې د سعودي عربستان پلازمېنه ریاض کې د روانې نومبر میاشتې له ۷مې تر ۲۱مې نېټې ترسره شوې؛ د ۵۷ هېوادونو شاوخوا ۳۵۰۰ لوبغاړو په کې برخه اخیستې وه.
له افغانستان څخه ۵۷ ورزشکارانو په ۱۳ بېلابېلو ورزشي څانګو کې ګډون درلود چې د سرو زرو، سپینو زرو او برونزو درې مډالونو په ګټلو سره یې د مډالونو په جدول کې ۲۶م مقام خپل کړ.
ترکیې په دې سیالیو کې د سرو زرو ۷۲ مډالونو په ګټلو لومړی، ازبېکستان د سرو زرو د ۲۹ مډالونو په ګټلو دویم او ایران بیا د سرو زرو د ۲۹ مډالونو په ګټلو سره درېیم مقام خپل کړ.
