که څه هم د هاکي لوبه ښایي په خوست ډېرو خلکو ته نا اشنا وي، خو په دې ولایت کې شاوخوا دوه سوه لوبغاړي شته چې له لسو څخه په زیاتو کلبونو کې د هاکي لوبو ته دوام ورکوي.
ولایتي چارواکي وايي، د دې ولایت ګڼ لوبغاړي د هاکي ملي ټیم کې غړیتوب لري او زیاتوي چې په ولایتي کچه هم د دې لوبې پراختیا لپاره هڅې روانې دي.
د خوست بدني روزنې آمرعطاءالله کډوال وايي: « موږ له خپلو امکاناتو زیات د دوی لپاره هڅې کړې. هاکي یوه داسې لوبه ده چې ډېر ګران بیه لوبغالي ته اړتیا لري، خو موږ تر اوسه نه یو بریالي شوي چې لپاره یې غټ میدان جوړ کړو. موږ یوازې د دې فرشي میدان په جوړولو وس بری شوی او دوی په کې لوبې کوي.»
اخوا د هاکي ځینې لوبغاړي وایي، خوست کې د هاکي لوبې ګڼ استعدادونه شته، خو د امکاناتو په برابرولو ټینګار کوي.
د دوی په خبره، د تمریني کمپونو او لوبیزو وسایلو کمښت ترڅنګ، د ځانګړي لوبغالي نه شتوالی هغه ستونزې دي چې په دې ولایت کې يې د هاکي لوبې د غوړېدو مخه نیولې.
د هاکي لوبغاړی فضل شاه ځدراڼ وايي: « موږ حتا خاورین لوبغالی هم نه لرو، که څه هم دا لوبه یوه هموار لوبغالي ته اړتیا لري.»
د هاکي یو بل لوبغاړی عمر وايي: « زموږ ستونزه دا ده چې په ټول افغانستان کې د هاکي لپاره لوبغالی نه لرو، هیله لرو چې میدان جوړ شي او وسایل په واک کې راکړل شي، ځکه زموږ لوبغاړي اقتصادي ستونزې لري.»
خوست کې د هاکي لوبې رسمي سیالۍ چې د اتو لوبډلو له خوا ترسره شوې، په کې د ولایت مقام لوبډلې د خوست ښاروالۍ کلب ته په ماتې ورکولو سره لومړۍ مقام ترلاسه کړ.
