د ایران بهرنیو چارو وزارت وايي، یوازې ایراني ځواکونه کولی شي د هرمز تنګي امنیت وساتي او له دوی پرته به هېڅ یوه هېواد ته اجازه ورنه کړل شي چې د هرمز تنګي اړوند مسایلو کې لاس وهنه وکړي.
د ایران له خوا دا خبرداری داسې مهال ورکړل شوی چې بریټانیا او فرانسې چې دامهال دواړه د هرمز تنګي د خوندي کولو لپاره د یوه نړیوال ایتلاف د جوړولو هڅې کوي، فارس خلیج ته د خپلو بېړیو استولو خبر ورکړ.
تهران هرمز تنګي ته د جنګي بېړیو استولو پر وړاندې لندن او پاریس دواړو ته خبرداری ورکړی چې ځواکونه به یې د داسې څه پر وړاندې پرېکنده او بېړنی ځواب ورکړي.
د ایران بهرنیو چارو وزارت مرستیال کاظم غریب ابادي پر اېکس پاڼه لیکلي: « موږ دوی ته دا په یاد راوړل غواړو چې په دواړو حالتونو کې که جنګ وي یا سوله، دا یوازې ایراني ځواکونه دي چې د هرمز تنګي کې امنیت رامنځته کوي. دوی به هېڅ هېواد ته دا اجازه ورنه کړي چې په داسې مسئله کې لاس وهنه وکړي.»
د فرانسې ولسمشر ایمانوېل مکرون بیا په نایروبي کې د افریقا سرمشریزې پر مهال یوې خبري غونډې ته ویلي، د هرمز تنګي په اړه یې دریځ هماغه پخوانی دی.
د ده په خبره، د ایران او متحده ایالتونو دواړو له خوا د هرمز تنګي د کلابندۍ مخالف دی. مکرون زیاته کړې، هېواد یې هېڅکله د سمندري ځواکونو د ځای پر ځای کولو هوډ نه دی کړی بلکې دا یو امنیتي ماموریت دی.
د مکرون په خبره، دا کار به هم یوازې هغه مهال کېږي چې د متحده ایالتونو او ایران ترمنځ د سولې موافقه وشي.
د فرانسې ولسمشر وړاندې د ایران د ګواښ په اړه په خپلو خبرو کې ویلي وو چې د ځواکونو د ځای پر ځای کولو په تړاو هېڅ کومه پوښتنه نه ده موجوده.
ایمانوېل مکرون ویلي: « موږ له بریټانیا سره په ګډه یو ځانګړی ماموریت پیل کړی چې ۵۰ هېوادونه او نړیوال سازمانونه یې سره راټول کړي، ترڅو له ایران سره په همغږۍ او د سیمې د ټولو هېوادونو او متحده ایالاتو په همکارۍ د وضعیتارامولو له لارې، ژر تر ژره که شرایط برابر شي، سمندري ټرافیک بېرته عادي شي.»
مکرون دغه راز ویلي، د افریقا لویې وچې ټول هېوادونه د هرمز تنګي د کلابندۍ قرباني دي.
د هرمز تنګی په فارس خلیج کې ټولو بندرونو ته د تګ راتګ یوازینۍ لاره ده، د ایران له خوا تړل کېدو او د امریکا له خوا کلابندۍ یې په ټوله نړۍ کې د انرژۍ بحران رامنځته کړی او په نړیوالو ماکېټونو کې تېلو بیو د لوړېدو سبب ګرځیدلی.
تېره اوونۍ فرانسې اعلان وکړ چې د دوی له خوا د پلان شویو عملیاتو لپاره د چمتوالي په لړ کې یې د الوتکو یوه لېږدونکې بېړۍ له سویس کانال څخه تېره شوې ده.
