د سوداګرۍ او پانګونې خونه وايي، د سوداګرۍ او پانګونې خونې د رییس او په کابل کې د روسیې د سفیر ترمنځ د خبرو زیات تمرکز د دواړو هېوادونو ترمنځ د سوداګریزو او اقتصادي اړیکو پر پراختیا او په افغانستان کې د پانګونې لپاره د روسي پانګوالو پر هڅولو ورټول و.
د سوداګرۍ او پانګونې خونې په یوه خبرپاڼه کې ویلي، سید کریم هاشمي د روسیې له سفارت غوښتي چې روسي پانګوال وهڅوي، ترڅو په افغانستان کې له اقتصادي پلوه په ګټورو او مهمو برخو کې د پانګونې فرصتونه وڅېړي.
د سوداګرۍ او پانګونې خونې د اطلاعاتو او عامه اړیکو آمر، احسان الله احسان شمشاد ته وویل، د یادې خونې رییس د روسیې له سفیر څخه غوښتي چې د تلې میاشتې په ۱۵ نېټه په کابل کې د امام ابوحنیفه په پنځم ملي او نړیوال نندارتون کې د روسي سوداګرو او شرکتونو د ګډون زمینه برابره کړي.
د سوداګرۍ او پانګونې خونې د اطلاعاتو آمر وايي: « د افغانستان د سوداګرۍ او پانګونې خونې عمومي رییس، د اوزبېکستان خپلواکۍ د ۳۵ کلیزې په مناسبت جوړو شویو مراسمو کې د روسیې له سفیر سره کتلي. په دې لیدنه کې د دواړو هېوادونو د خصوصي سکټورونو ترمنځ د همکاریو پر پراختیا او پیاوړتیا خبرې شوې. د افغانستان د سوداګرۍ او پانګونې خونې عمومي رییس وړاندیز کړی چې افغانستان کې پانګونې ته د روسیې پانګوالو د هڅونې په موخه دې، رامنځته شوي فرصتونه وڅېړل شي.
احسان وړاندې وايي چې په دې لیدنه کې مسکو ته د افغان سوداګریز پلاوي د راتلونکي سفر په اړه هم خبرې وشوې او د پانګونې رییس، عبدالکریم هاشمي د افغان پلاوي او د روسیې د خصوصي سکټور او په ځانګړي ډول د سوداګرۍ او صنایعو د خونې ترمنځ لیدنې تنظیم کړي.
په افغانستان کې د روسي سوداګرو او پانګوالو د پانګونې لپاره دا خبرې داسې مهال شوې دي چې اوس د سعودي عربستان دلتا انټرنېشنل کمپنۍ د نفتو او ګازو په برخه کې د پانګونې تړون لاسلیک کړ.
له دې سره سم، دا هم ویل کیږي چې د ناروې، قطر، اذربایجان او د یو شمېر نورو هېوادونو کمپنۍ هم په افغانستان کې پانګونې ته لېواله دي.
په یوه تازه اقدام کې د متحده عربي اماراتو یوه شرکت(اېچ اېچ اېم) غواړي د سالنګ د دویم تونل په جوړولو او د درملو فابریکو په جوړو کې پانګونه وکړي.
احسان الله احسان وړاندې په خپلو خبرو کې وايي چې د روسیې سفیر دیمیتري ژیرنوف د امام ابوحنیفه د پنځم ملي او نړیوال نندارتون د جوړولو هرکلی وکړ او ژمنه یې وکړه چې روسي سوداګر او شرکتونه په یاد نندارتون کې ګډون کولو ته وهڅوي.
د سوداګرۍ او پانګه ونې خونې د اطلاعاتو آمر، احسان الله احسان په دې اړه وايي: « د افغانستان د سوداګرۍ او پانګونې خونې عمومي رییس، دغه راز په کابل کې د روسیې له سفارت غوښتي چې د امام ابوحنیفه په پنځم ملي او نړیوال نندارتون کې روسي پانګوال او سوداګر ګډون ته وهڅوي. په کابل کې د روسیې سفیر دا وړاندیزونه معقول بللي او ډاډ یې ورکړی چې روسیې پانګوال او سوداګر به په دې نندارتون کې ګډون ته وهڅوي.»
د روسي سوداګرو او پانګه والو د هڅولو په اړه دا خبرې داسې مهال شوې دي چې اسلامي امارت په هېواد کې کورنیو او بهرنیو پانګوالو ته د لازمو اسانتیاو رامنځته کولو خبره کوي.
د ریاست الوزرا اقتصادي مرستیال ملا عبدالغني برادر وايي، اسلامي امارت په هېواد کې بهرنیو پانګونې ته لازم شرایط برابر کړي دي.
بله خوا، د افغانستان لپاره د امریکا د متحده ایالاتو پخواني ځانګړي استازي، ډاکټر زلمي خلیلزاد هم ویلي چې په افغانستان کې شوي پرمختګونه د بهرنیانو پانګونې ته لازم شرایط برابر کړي دي.
