د افغانستان په سوېل ختیځ کې پروت خوست هغه ولایت دی چې په کې د کرېکټ لوبې ګڼ مینه وال او استعدادونه شته دي او اوس د کورني کرېکټ تر ټولو ستر لیګ «شپږیزه» کوربه توب ته په چمتوالی بوخت دی.
د خوست کرېکټ ځایي مسوولین وایي، د شپږیزې لیګ سیالیو د ښه ترسره کېدو لپاره د چمتوالي چارې په چټکۍ روانې دي او دا به د دې ولایت د کرېکټ لا ودې لپاره یو مهم ګام وي.
د خوست کرېکټ آمریت د رسنیو مسوول اکبرعلي سمون وايي: « په لوبغالي کې دننه ننداره کوونکو لپاره ځایونه تقریبا ً بشپړېدو ته نږدې دي او دغه راز په نورو برخو کې هم څه چې اړین دي او د سیالیو د ښکلا سبب کېږي، کارونه یې یا وروستي شوي یا هم بشپړ شوي دي.»
د کرېکټ روزنکی محمد کیف ځدراڼ وايي: « په دې لوبو کې د ملي لوبغاړو تر څنګ د اکاډمۍ لوبغاړي، ځوان لوبغاړي چې په ټیمونو کې لوبېږي، شامل دي. دا د خوست کرېکټ لپاره یو ستر فرصت دی.»
له بلې خوا، د خوست اوسېدونکي تمه لري چې د کرېکټ د زرګونو مینه والو او مېلمنو راتګ به د دې ولایت پر بازارونو، هوټلونو، ټرانسپورټ، ګرځندوی او نورو خدماتي برخو مثبت اغېز وکړي.
دوی زیاتوي، خوست د کرېکټ په برخه کې د پام وړ ظرفیتونو پر لرلو سربیره، د خپل طبیعي ښایست او مېلمه پالنې له امله هم د هېواد په ولایتونو کې مهم ځای لري چې د شپږیزې کوربه توب به یې شهرت لا زیات کړي.
خوست اوسېدونکي رشیدالله همدرد وايي: « ښکلي خوست ته به د افغانستان له ټولو ولایتونو مېلمانه راځي او د خوست خلک به یې خدمت کوي. له دې سره د ټول افغانستان د ځوانانو ترمنځ اړیکې پياوړې کېږي.»
خوست اوسېدونکی شاهدالله پیر وايي: « دا ډول ستر لیګونه جوړېدل خوست ته اقتصادي ګټې هم لري. دلته به ډېرو ولایتونو خلک راشي، دلته به سودا وکړي او تفریحي ځایونه به وویني.»
د افغانستان کورني کرېکټ په چوکاټ کې د شپږیزې لیګ یولسم پړاو سیالۍ به د جولای میاشتې له لومړۍ تر ۱۴مې نېټې د خوست په رحمت ولي مسرور کرېکټ لوبغالي کې ترسره شي.
په دغو سیالیو کې به د ملي لوبغاړو په ګډون د هېواد د پنځو زونونو اړوند لوبډلې د اتلولۍ ګټلو لپاره له یو بل سره سیالۍ وکړي.
