د روانې جون میاشتې له ۴ تر ۶ نېټې د اوزبېکستان په تاشکند ښار کې د مرکزي او جنوبي اسیا ترمنځ د اتصال په اړه د ترمذ ډیالوګ دوهمه غونډه جوړېږي.
د «سوله، اتصال او پیاوړتیا؛ د ګډې هوساینې لپاره د بنسټونو جوړول» تر نوم لاندې په دې غونډه کې به له ۱۵۰ څخه زیات سیاسي، اقتصادي او اکاډمیک شخصیتونه او د نړیوالو او سیمهییزو سازمانونو استازي ګډون ولري.
د غونډې موخه د مرکزي او جنوبي اسیا ترمنځ د همکاریو پراختیا، د ټرانزیټي دهلېزونو پیاوړتیا او د اقتصادي اتصال لپاره د ګډو لارو چارو موندل ښودل شوي.
د اوزبېکستان بهرنیو چارو وزارت ویلي: « په دې فورم کې به له ۱۵۰ څخه زیات استازي ګډون وکړي چې په کې د سیاسي، سوداګریزو او علمي څېړنیزو ټولنو غړي، همدارنګه د نړیوالو او سیمهییزو سازمانونو استازي شامل دي. ګډونوال به د مرکزي او جنوبي اسیا، اروپا، د خپلواکو دولتونو د ګډې ټولنې سمندر سیمې، منځني ختیځ او امریکا څخه وي. دا پراخ ګډون د ترمذ ډیالوګ د ټولشموله او پرانستي نړیوال پلټفورم ماهیت څرګندوي چې موخه یې د اسیا په سیمه کې د نښلونې متقابل باور او دوامداره پرمختګ د پیاوړتیا لپاره د ګډو لیدلورو او تګلارو رامنځته کول دي.»
ترمذ ډیالوګ چې په ۲۰۲۵ کال کې د یوه دایمي نړیوال پلټفورم په توګه رامنځته شوی، هڅه کوي د سیمې هېوادونه د اقتصادي، ټرانزیټي او سوداګریزو همکاریو لپاره سره نږدې کړي.
سیاسي شنونکي باور لري چې د افغانستان استازي باید په دې غونډه کې د سیمهییز اتصال په پروژو کې د افغانستان پر مرکزي رول ټینګار وکړي او د ټرانزیټ، سوداګرۍ او زېربنایي همکاریو د پراختیا غوښتنه مطرح کړي.
د شنونکو په وینا، د افغانستان له خاورې د مرکزي او جنوبي اسیا د نښلولو پروژې نه یوازې د سیمې د اقتصادي ودې لپاره مهمې دي بلکې کولی شي افغانستان هم د یوه مهم اقتصادي دهلېز په توګه مطرح کړي.
د سیاسي چارو شنونکی شهسوار سنګروال وايي: « دا کار هم د سولې لپاره ځانګړی ارزښت لري او هم د سوداګرۍ لپاره. افغانستان ته یې ارزښت دا دی چې زموږ هېواد په سیمه کې له جغرافیايي پلوه مرکزي ځای لري او په دې سره شمالي او جنوبي اسیا یوازې د افغانستان له لارې وصلېدای شي.»
د چارو شنونکی محمداسماعیل ځدراڼ وايي: « د اسلامي امارت مشران باید له دې څخه سالمه ګټه واخلي. هغه کسان چې له افغانستان څخه ځي او په دې کنفرانس کې ګډون کوي، باید له نړیوالو او د سیمې هېوادونو ته قانع کوونکي ځوابونه ورکړي. تر ټولو مهمه د رسمیاتو موضوع ده او باید اوسنی دولت په رسمیت وپېژندل شي.»
شنونکي همدارنګه ټینګار کوي چې افغان پلاوی باید د رېل پټلۍ، انرژۍ لېږد، سوداګریزو اسانتیاوو، پانګونې جلبولو او د سیمهییزو اقتصادي پروژو د چټکتیا موضوعات، د بحث مهم محورونه وګرځوي.
د سیاسي چارو شنونکی توریالی ځاځی وايي: « زه ډاډمن یم چې دا هېوادونه دغه شان غونډې د خپلو ګټو لپاره جوړوي او په خپلو هېوادونو کې یې جوړوي. که چېرې دوی د افغانستان د ګټو لپاره غونډې کوي، نو ولې یې په افغانستان کې نه جوړوي؟»
د معلوماتو پر بنسټ، په دې غونډه کې افغان پلاوي هم ګډون کوي، خو تر اوسه يې د یادې ناستې په اړه رسمي څه نه دي ویلي.
د ترمذ ډیالوګ دوهمه غونډه په داسې حال کې ترسره کېږي چې د سیمې هېوادونه د اقتصادي همکاریو او متقابل اتصال د پراختیا لپاره نوې لارې لټوي.
تمه ده چې افغانستان به هم په دې ناسته کې د خپل جغرافیایي موقعیت او اقتصادي ظرفیتونو پر بنسټ د سیمهییزو همکاریو د پیاوړتیا لپاره خپل لیدلوری وړاندې کړي.
