افغانستان لپاره د چین ځانګړي استازي تازه له خپل پاکستاني سیال محمد صادق خان سره په لیدنه کې د اختلافاتو د حل په موخه د چین په ارومچي کې د کابل او اسلاماباد ترمنځ د مذاکراتو او پيل شوې پروسې په اړه غږېدلي.
یو شیاویونګ دا نه دي ویلي چې له صادق خان سره په خبرو کې یې د کابل او اسلام اباد ترمنځ په اپرېل میاشت کې د پیل شوي لومړي پړاو مذاکراتو پر کومو اړخونو غږېدلي، خو په دې اړه خبرې یې رغوونکې بللې دي.
په ورته مهال، د پاکستان ځانګړي استازي پر خپله اېکس پاڼه د دې لیدنې په اړه زیاته کړې، دواړو خواوو د سیمهییز امنیت ترڅنګ، له افغان خاورې د ورپېښو ګواښونو په تړاو خبرې کړې.
محمدصادق خان زیاته کړ ې: « له خپل چینايي سیال یو شیاویونګ او مل پلاوي سره مې د سیمهییز امنیت او د ټيټيپي او ختیځ ترکستان اسلامي خوځښت د ګواښونو په تړاو چې له افغان خاورې یې پېښوي، رغوونکې خبرې درلودې.»
په دې لیدنه کې پر دې هم بحث شوی چې څنګه کېدای شي د سیمهییزې سولې او ثبات ساتنه او د ترهګرۍ ضد برخو کې همکارۍ او همغږي پیاوړې شي.
هاخوا د پاکستان لومړي وزیر شهباز شریف دفتر ویلي، نوموړي د اروپايي ټولنې او کمیسیون له ورغلو لوړ پوړو چارواکو سره د سوېلي اسیا او افغانستان د وضعیت په اړه خپل لیدلوری شریک کړي، خو په اړه یې نور جزییات نه دي خپاره شوي.
د پاکستان لومړي وزیر دفتر ویلي: « لومړي وزیر د اروپايي ټولنې له لوړ پوړي استازي سره په خبرو کې د سوېلي اسیا او افغانستان سیمهییز وضعیت په تړاو د پاکستان لیدلوری شریک کړ.»
اسلامي امارت د وسلهوالو ډلو موجودیت، ګاونډ او سیمې ته د ګواښ پېښولو په تړاو د پاکستان او نورو هېوادونو تورونه او ادعاوې په کلکه رد کړې او د نور په ضد یې د افغان خاورې پر نه کارېدو ټینګار کړی.
بله خوا، د افغانستان اوسني حکومت هم تل له پاکستان سره پر خبرو ټینګار کړی او د اختلافونو د حل یوازینۍ لاره یې خبرې اترې بللې دي.
اسلامي امارت بیا وايي، د ارومچي له خبرو اترو وروسته په رسمي ډول بیاځل د مذاکراتو پیل لپاره اقدامات نه دي شوي، خو په غیرمستقیم ډول هڅې تاییدوي او له پاکستان سره د خبرو دروازه پرانېستی بولي.
د اسلامي امارت مرستیال ویاند حمدالله فطرت وايي: « له پاکستان سره د خبرو دروازې خلاصې دي او له مختلفو لارو هڅې کېږي چې دا خبرې روانې وساتل شي. که څه هم د چین په ارومچي کې له مخامخ خبرو وروسته بیا مخامخ خبرې نه دي شوې، خو بیا هم هڅې کېږي.»
دا داسې مهال ده چې څو ورځې وړاندې داسې راپورونو خپاره شول چې ګواکي افغان او پاکستاني لوری د خبرو د پيل لپاره بیاځل په کابل کې ناسته ترسره کوي، خو له ځینو راپورونو سربېره، اوسني حکومت یې په اړه رسمي دریځ څرګند نه کړ.
