د افغانستان کرېکټ ملي لوبډلې نوی روزونکی وایي، افغانستان ته له نویو فکرونو او انرژۍ سره راغلی او هڅه کوي چې افغان لوبډله له هر پلوه په پښو ودروي.
ریچارډ پایبس زیاتوي، له تېرو څو ورځو راهیسې یې د افغانستان کرېکټ بورډ له بېلابېلو برخو او لوبغاړو سره کتلي او پرګڼ شمېر مهمو مسایلو ورسره غږېدلی.
پایبس د ملي لوبډلې چمتوالي او راتلونکي تګلارې په اړه رابلل شوې خبرې ناسته کې ژمنه وکړه چې افغان لوبډله به له هر پلوه په پښو دروي او هڅه به کوي چې له افغان لوبغاړو سره له تخنیکي پلوه هم ښه زیار وباسي، ترڅو د ده په خبره، په درې واړو فارمټونو، ټیسټ، یوه ورځنیو او شل اوریز لوبو کې په نړیواله کچه ښې لاسته راوړنې ولري.
د افغانستان ملي لوبډلې نوی روزونکی ریچارډ پایبس وايي: « زه هڅه کوم د افغانستان کرېکټ ملي لوبډله په درې واړه فارمټونو کې ښه برابره کړم، ترڅو د کرېکټ په نړیوال ډګر کې ښې لاسته راوړنې ولري. زما به یوه لویه هڅه دا هم وي چې افغان لوبډله په ټېسټ کرېکټ کې ښه وځلېږي، ځکه دا زما د خوښې لوبه یا فارمټ دی.»
د افغانستان کرېکټ ملي لوبډلې روزونکي همدارنګه وویل، هڅه کوي چې افغان لوبډله د ۲۰۲۷ کال نړیوال جام سیالیو لپاره هم چمتو کړي، ترڅو هلته ښې لاسته راوړنې ولري.
د افغانستان کرېکټ بورډ چارواکو همدارنګه وویل، د نوي روزونکي په راتګ سره به یې چارې لا ګړندۍ او له نړیوالو معیارونو سره برابرې شي.
د دوی په خبره، هڅه کوي چې د افغانستان کورني کرېکټ او نړیوال کرېکټ ترمنځ شته فاصله راکمه یا له منځه یوسي.
د افغان کرېکټ د لوړو مهارتونو مرکز مدیر دولت احمدزی وايي: « موږ په دې بحث وکړ چې څنګه کولی شو د کورني کرېکټ او نړیوال کرېکټ ترمنځ شته واټن راکم کړو.»
د ملي لوبډلې چمتوالي او راتلونکي تګلارې په اړه رابلل شوې خبرې ناستې ته د افغانستان کرېکټ ملي لوبډلې لوبډلمشران هم رابلل شوي وو.
د ورځنیو او ټېسټ لوبو لوبډلمشر حشمت الله شهیدي او د شل اوریزو لوبو لوبډلمشر ابراهیم ځدراڼ وویل، له نوي روزونکي سره به ګډه هڅه وکړي چې راتلوونکو نړیوال جامونو ته ښه چمتوالی ولري.
د ورځنیو او ټېسټ لوبډلمشر حشمت شهیدي وايي: « ما له مشر روزونکي سره خبرې وکړې او دوی په دې ټینګار کوي چې باید د لوبو لپاره ښه چمتوالی ونیول شي. همدارنګه دی غواړي چې د افغانستان په کورني کرېکټ کې هم ښکېل اوسي.»
د شل اوریزو لوبو لوبډلمشر ابراهیم ځدراڼ وايي: « زه ډاډمن یم چې نوی روزونکی به خپلې تجربې او مشورې له لوبغاړو سره شریک کړي. موږ په ګډه هڅه کوو چې د افغانستان د کرېکټ لپاره ډېر څه وکړو.»
د یادولو ده چې افغان لوبډله به په راتلونکو څو ورځو کې د نوي مشر روزونکي تر مشرۍ لاندې څلور اوونیز کمپ ولري چې په ترڅ کې به یې د ملي لوبډلې لوبغاړو ترڅنګ، نوي لوبغاړي هم برخه ولري..
د کرېکټ بورډ چارواکو په خبره، دا کمپ له هند سره د راتلونکې لوبلړۍ او د ۲۰۲۷ نړیوال جام سیالیو ته د چمتوالي لپاره پیل کېږي.
