په خوست رحمت ولي مسرور کرېکټ لوبغالي کې د افغانستان کرېکټ بورډ کورني کرېکټ څانګې له لوري لومړۍ درجه ولایتي سیالۍ چې په دوو ګروپونو کې ترسره کیږي، د ۱۲ لوبډلو ترمنځ پېل شوې.
مسوولین وایي، یادې سیالۍ د کورني کرېکټ د ټاکل شوي مهالوېش له مخې ترسره کېږي چې موخه یې د هېواد بېلابېلو کورنیو سیالیو او ملي لوبډلو ته د غوره لوبغاړو لار موندنه ده.
د افغانستان کرېکټ بورډ کورني کرېکټ استازی زاهد الرحمن ځدراڼ وايي: « د دې لوبو موخه د کرېکټ وده او د لوبو د نورو فارمټونو لپاره د لوبغاړو غوره کول او دغه راز کورني کرېکټ او شپږیزه غوره لیک ته د لوبغاړو انتخاب دی.»
په ورته مهال، په یادو سیالیو کې لوبېدونکي لوبغاړي خوښ دي چې په دې سیالیو کې ورته د لوبېدو زمینه برابره شوې او ترڅنګ یې زیاتوي چې دا ډول لوبې به دوی ته فرصت برابر کړي، ترڅو په راتلوونکي کې د لا لوړې کچې لوبو کې د لوبېدو مهارتونه ترلاسه کړي.
لوبغاړی احمد رشاد ستانکزی وايي: « له دې لوبو څخه موږ درې ورځنیو لوبو، ټېسټ لوبو او د وایډ بال کرېکټ ته ورځو. همدارنګه د ۱۹ کلنو لوبډلې ته د ورتګ لپاره دا یوه ښه لاره ده.»
لوبغاړی لیس لونګ وايي: « موږ له بورډ څخه ډېره مننه کوو، خو یوازې دومره په کار دي چې دا ډول مېچونه نور هم ډېر کړي او لپاره یې نور لوبغالي جوړ کړي.»
لوبغاړی حبیب تڼیوال وايي: « زه د لومړي ځل لپاره په دې لوبو کې برخه اخلم او له دې امله ډېر خوشاله یم. له مشرو لوبغاړو سړی ډېر څه زده کولی شي او موږ هم کوښښ کوو چې یوڅه ترې زده کړو. زه غواړم نور هم مخکې لاړ شم او تر ملي ټیم ځان ورسوم.»
باید وویل شي چې د وزیر محمد اکبر خان لومړۍ درجه ولایتي سیالیو له یو ورځنیو لوبو وروسته به د دې لوبو شل اوریزه بڼه لوبې هم په خوست او ننګرهار ولایتونو کې د همدې لوبډلو او لوبغاړو له لوري ترسره شي، ترڅو له دواړو بڼو څخه پیاوړي لوبغاړي ملي شل اوریزو، لېسټ اې او میرویس نیکه درې ورځنیو سیالیو ته لار ومومي.
