په کابل کې د بدني روزنې او ورزش فډارسيون د پکتیکا د منډې وهلو هغه لوبغاړي هڅې وستایلې چې د دې ولایت له مرکز ښرنې څخه یې تر غزني ښاره ۶۲ کیلومټره منډه له لویې دمې پرته وهلې ده.
وکیل احمد پکتین وایي، د منډې پر مهال يې یوازې د دوو لمنځونو، اوبو او مېوې خوړلو لپاره لنډه دمه کړې او له دې پرته یې د ساه جوړونې بله دمه نه ده کړې.
نوموړی زیاتوي، د دې منډې لپاره یې مسلکي تمرینونه کړي وو او له دې وړاندې یې هم لنډې او اوږدې منډې وهلې وې. دی اوس غواړي په اوږده منډه کې په نړیواله کچه د افغانستان استازیتوب وکړي.
د منډې وهلو لوبغاړی وکیل احمد پکتین وايي: « دا زما آرمان دی او د دې پوره کولو لپاره مې ډېرې خوارۍ کړې دي. که وخت راکړل شي، زه به نه یوازې د سیمې بلکې د نړۍ په کچه د افغانستان استازیتوب وکړم.»
د اولمپيک ملي کمېټې د بدني روزنې او ورزش فډراسيون بیا وایي، هڅه کوي د پکتیکا ټولو ورزشکارانو لاسنیوی او ملاتړ وکړي. د دوی په خبره، اوس مهال ورزش له مرکز څخه نورو ولایتونو ته هم غځېدلی او هلته هره ورځ په دې برخه کې لاسته راوړنې لري.
د اولمپيک ملي کمېټې ریيس مولوي احمدالله وثيق وايي: « دا د خوښۍ ځای دی چې ورزش اوس له مرکز څخه لرې پرتو سیمو ته هم پراختیا موندلې. موږ اوس په لرې پرتو ولایتونو او ولسوالیو کې د ورزش څانګې لرو او ښه فعالیتونه لري. له ټولو ولایتونو څخه د ورزشي فعالیتونو ښه خبرونه راځي.»
د پکتیکا د اولمپیک او لوبو ولایتي آمر له پانګوالو غواړي چې د دې لوبغاړي مالي ملاتړ وکړي، ترڅو د نړیوالو سیالیو جوګه شي. د نوموړي په خبره، په پکتيکا کې ورزش ته زیات پام شوی او لا هڅه کېږي چې د ورزشکارانو کلک ملاتړ وکړي.
د پکتیکا د اولمپیک او لوبو ولایتي آمر عثمان سیرت وايي: « پکتیکا یو له هغو ولایتونو څخه دی چې ډېر ورزشکاران لري. که څه هم په تېر کې پکتیکا ته پاملرنه نه کېده، خو اوس د امارت په راتګ سره د پاملرنې کچه لوړه شوې. دلته ښه استعدادونه شته او باید استعداد ته یې وده ورکړل شي.»
د اولمپيک ملي کمېټه داسې مهال د منډې وهلو د یوه لوبغاړي هڅې ستایي چې په وروستیو کې ګڼ شمېر افغان لوبغاړي په نړیواله کچه د لوبو پر مهال په بېلابېلو برخو کې لاسته راوړنې لري.
