د روان کال وزلوبې لیګ اووم پړاو په پای لوبه یا فاینل کې د سرپل او بدخشان لوبډلې سره مخ شوې چې له یوې خورا سختې او خوندورې لوبې وروسته، سرپل لوبډلې بدخشان ټیم ته ۷ صفر پر وړاندې ماتې ورکړه او په دې توګه یې د وزلوبې لیګ اتلولي خپله کړه.
د سرپل وزلوبې فډراسیون رییس حاجي داوود وايي: « زموږ یې ډېر ملاتړ وکړ، هم یې ښه پهلوانان وټاکل او هم یې ښه آسونه وپېرل. موږ هم ښې مبارزې وکړې او اتلولي مو خپله کړه.»
د سرپل لوبډلې غړی پهلوان حاجي محمد وايي: « زموږ د بریا راز په دې کې وو چې موږ ډېر اتفاق او اتحاد درلود، آسونه او پهلوانان مو دواړه قوي وو، که څه هم د بدخشان ټیم کمزوری نه و، خو بس موږ سره چانس یاري وکړه. موږ دا اتلولي ټولو مینه والو ته مبارکي وایو.»
بغلان او کندز لوبډلو چې په سیمي فاینل یا نیمه پای لوبه کې له بدخشان او سرپل لوبډلو ماتې خوړلې وه، د درېیم مقام پر سر له یو بل سره ولوبېدې چې په پایله کې بغلان لوبډلې کندز لوبډلې ته شپږ د څلورو پر وړاندې ماتې ورکولو سره د ۱۴۰۴ کال د وز لوبې لیګ اووم پړاو کې درېیم مقام خپل کړ.
د بغلان وزلوبې فډراسیون مرستیال محمد نعیم احمدزی وايي: « که څه هم درېیم مقام لوړ مقام دی، خو زموږ تمه دا وه چې لومړی مقام وګټو. د ځینو ستونزو او د آسونو د کمزورتیا له امله موږ درېیم مقام خپل کړ.»
د بغلان لوبډلې لوبډلمشر پهلوان دادالله وايي: « درېیم مقام ټیټ مقام نه دی بلکې دا هم لوړ امتیاز دی. موږ خپله هڅه وکړه او دوستانه لوبه مو وکړه.»
د کندز لوبډلې یو تن لوبغاړی وايي: « د لوبې په پيل کې زموږ د پهلوانانو ترمنځ ښه همغږي نه وه او هغوی څو اسانه امتیازونه واخیستل. ورپسې موږ خپل نظم برابر کړ، خو بیا هم کندز وبایله. موږ بغلان لوبډلې ته مبارکي وایو.»
د المپيک ملي کمېټې چارواکي د وزلوبې سږنی ليګ ځکه له لاسته راوړنو ډک بولي چې په خبره يې، غوره لوبغاړي به ترې د نړيوالو لوبو لپاره انتخاب کړي.
د المپيک ملي کمېټې ریيس احمدالله وثيق وايي: « دا ټیمونه چې دلته یې لوبې وکړې، موږ به له دوی څخه تکړه چاپه اندازان او پهلوانان انتخابوو او له افغانستان څخه د باندې لوبو کې به لوبېږي. د وزلوبې ملي ټیم به هم لکه د نورو فډراسیونونو په څېر افغانستان ته ویاړونه راوړي.»
د ملي راډيو ټلوېزيون رییس قاري يوسف احمدي وايي: « له دې ډول لوبو او پروګرامونو څخه موخه دا ده چې د هېواد مختلف اقشار له یو بل سره وپېژني؛ ځکه چې لوبې له یو بل سره د پېژندلو او نږدې کېدلو تر ټولو غوره وسیله ده.
د وزلوبې په سږني لیک کې د جرنډ په نوم سور آس د اووم پړاو د غوره آس په توګه انتخاب شو.
د یادونې ده چې د افغانستان د وزلوبې لیګ هرکال د ژمي په موسم کې په پلازمېنه کابل کې ترسره کېږي او د سرپل، بدخشان، بغلان او کندز لوبډلو سربېره، دوولس ټیمونه په کې ګډون لري او شاوخوا ۱۰ ورځو په موده کې ترسره کېږي.
