پلازمېنه کې د وزلوبې(بزکشي) لیګ د اووم پړاو په نیمه پایله کې د بدخشان ټیم بغلان او د سرپل ټیم کندز ته ماتې ورکړه او پای لوبې ته ووتل.
د بغلان او بدخشان وزلوبې لوبډلو ترمنځ لومړۍ نیمه پایله لوبه کې د بغلان لوبډلې د لوبې ترپایه یوازې د یوه امتیاز په اخیستو بریالی کېږي او بدخشان لوبډله بیا د بغلان پر وړاندې درې ځلې خوسکی د حلال یا د نومرو اخیستو دایرې ته رسوي.
د بغلان د وزلوبې فډراسیون مرستيال محمد نعیم احمدزی وايي: « دا زموږ د کابل ټیم یو اتل او قهرمان آس دی، خو تاسو وینی چې دا آس ټپي شوی او ښکاري چې په چاړه وهل شوی؛ دا کار باید نه وای شوی او پوښتنه یې باید وشي. موږ له همدې امله لوبه وبایلله.»
د بدخشان د وزلوبې فډراسیون ریيس ملا حیدر حيدري وايي: « زموږ د نن ورځې بریا یوازینی لامل زموږ د لوبغاړو ښه کارکردګي وه. دوی په لوبه کې ښه اتفاق او ابتکارونه لرل.»
د کندز او سرپل لوبډلو ترمنځ دویمه نیمه پای لوبه یا سیمي فاینل ترسره شو. په دې لوبه کې د سرپل لوبډلې د کندز لوبډلې پر وړاندې ۹ نمرې ترلاسه کړې او د کندز لوبغاړو یوازې دوه ځلې اورغومی په ټاکل شې حلال دایر کې واچوه چې له دې سره سرپل کندز ته ماتې ورکوي او پای لوبې ته ځي.
د سرپل د وزلوبې فډراسیون مرستيال محمد پهلوان وايي: « زموږ د کندز ولایت آسونه څه ناڅه کمزوي وو، خو د سرپل ولایت آسونه ډېر قوي وو او له همدې امله مو لوبه بایلوده.»
د کندز د وزلوبې فډراسیون رییس نقیب الله ناصري وايي: « موږ فاینل ته لاره پيدا کړه، زموږ پهلوانان او آسونه دواړه قوي دي، هیله لرم د اتلولۍ جام هم وګټو.»
زرګونه نندارچیان له بېلا بېلو ولایتونو له کندهار نیولې تر بدخشانه د وزلوبې لیدو لپاره پلازمېنې کابل ته راغلي. دوی وايي، خوښ دي چې په هېواد کې دا ډول سترې سیالۍ ترسره کېږي او دوی یې له لیدو خوند اخلي.
د وزلوبې نندارچي محمد ولي جانان وايي: « موږ له کندهاره د دې لوبې لیدو ته راغلي یو. ښه لوبه او ښه خوند یې وکړ. خدای دې وکړي چې تل همداسې خوشالۍ ولرو.»
نندارچي سمېع الله وايي: « وزلوبه ډېره جالبه او د لیدو وړ لوبه ده. دا ځل داسې لوبې وشوې چې په تېرو اوو دورو کې نه وې شوې.»
نندارچي ملک شینواری وايي: « موږ له لوبو ډېر خوند واخیست. ښه امنیت دی او ټول خلک په یوه میدان کې راټول دي. دا زموږ د ملت د اتفاق ښکارندويي کوي.»
ټاکل شوې د دوشنبې په ورځ د بدخشان او سرپل لوبډلو ترمنځ د افغانستان وزلوبې لیګ اووم پړاو پای لوبه ترسره شي. هره لوبډله چې کټوونکې وي، نو د اتلولۍ جام به ورکول کېږي، خو هېره دې نه وي چې د کندز او بغلان لوبډلې چې په نیمه پایله لوبه کې له ليګ بهر شوې، د درېیم مقام پر سر به له پای لوبې وړاندې له یو بل سره ولوبېږي.
