د افغانستان د المپیک ملي کمېټې د ازبېکستان په تاشکند کې د موی تای په اسیایي سیالیو کې د افغان لوبغاړو د ښه ځلېدو هرکلی کړی او ټینګار یې کړی چې دوی باید په سیالیو کې د ترلاسه شویو بریاوو د خوندي ساتلو لپاره لا زیاتې هلې ځلې وکړي.
د ازبېکستان په تاشکند کې د ۲۰۲۵ میلادي کال د موی تای په اسیايي سیالیو کې چې په کې د ۱۳ هېوادونو لوبغاړو برخه اخیستې وه، افغان لوبغاړو خپلو سیالانو ته په ماتې ورکولو سره لس میډالونه په خپل نامه کړل.
د المپیک ملي کمېټې رییس احمدالله وثیق په خپلو خبرو کې په بېلابېلو برخو کې د افغان لوبغاړو په ملاتړ ټینګار وکړ.
احمد الله وثیق زیاته کړې: « کله چې دوی ځانونه تر دغو هېوادونو رسوي، د اولمپیک د نړیوالې کمېټې له خوا دوی ته لګښتونه ورکړل شوي دي او دلته هم د تمرین پرمهال د بدني روزنې ادارې د دوی د تمریناتو د تعقیب لپاره یو ټیم ټاکلی و چې هره ورځ یې د د غو ورزشکارانو تمرینات کتل، ترڅو دوی د دې جوګه شي چې په دغو لوبو کې برخه واخلي.»
د افغانستان د موی تای فډراسیون د چارواکو په وینا، په دې سیالیو کې ۱۷ تنو افغان لوبغاړو ګډون کړې و چې د خپلو سیالانو په ماتولو سره یی ۲ د سره زرو میډالونه، ۴ د سپینو زرو او ۴ د برنزو میډالونه ګټلي دي.
د موی تای فډراسیون فني او مسلکي مرستیال عبدالصادق ابراهیمي وايي: « موږ دغه بریاوې د افغانستان د بدني روزنې ادارې او اولمپیک ملي کمېټې ته مبارکي وایو. همدارنګه د دغو ورزشکارانو کورنیو او د افغانستان ټول ولس ته هم مبارکي وایم. په دغو لوبو کې موږ دوه پلاوي او یو تن روزونکی هم درلودل چې د افغانستان په استازیتوب یې ګډون درلود.»
د ازبېکستان په پلازمینه تاشکند کې د موی تای اسیایي سیالۍ د روانې نومبر میاشتې له ۱۱ نیټې تر ۱۶پورې دوام درلود.
له دې مخکې د هېواد د موی تای ملي لوبغاړي محمد یوسف جهانګیر د اسلامي هېوادونو د پیوستون په سیالیو کې د خپل ترکي سیال په ماتولو سره د سرو زرو میډال خپل کړی و.
