ننګرهار د بدني روزنې او ورزش ریاست په همغږۍ، د زندانونو چارو سمون ادارې او والیبال فډراسیون له لوري د دې ولایت په مرکزي زندان کې د والیبال پيل شوې سیالۍ پای ته ورسېدې.
په دغو سیالیو کې د ننګرهار، کونړ، لغمان، کاپیسا، پروان او کابل ولایتونو د زندانونو له لوبډلو سربېره، د جلال اباد ښار او ولسوالیو د والیبال مشهورو کلپونو او لوبډلو برخه اخیستې وه چې موخه یې زندانیانو ته د سالمو بوختیا برابرول وو.
د ننګرهار مرکزي زندان رییس مولوي سهیل سعید وايي: « د والیبال له دې لوبو څخه موخه د بندیانو لپاره تفرېح او له اندېښنو څخه راګرځونه ده. د دا ډول پروګرامونو له لارې بندیانو ته د تفرېح موقع برابرېږي او سپورټ هم کوي.»
د والیبال د دې ټورنمېنټ پای لوبې ته د سهیل سعید او شګې لوبډلو لاره پیدا کړې وه چې په وروستۍ لوبه کې سهیل سعید لوبډلې مقابلې لوبډلې ته ماتې ورکړه او د پای لوبې اتلولي یې خپله کړه.
د ننګرهار مرکزي زندان رییس په دې اړه وايي: « د دې لوبو ګټونکي ته لس زره افغانۍ جایزه په پام کې نیول شوې او د فاینل بایلونکي ته به ۵ زره افغانۍ ورکړل شي. همدارنګه جامې او نورې ډالۍ هم په پام کې نیول شوې.»
د والیبال د دې ټورنمېنټ لوبغاړي وایي، د دا ډول تفریحي پروګرامونو ترسره کول د رواني ناروغیو سره د مبارزې غوره لار ده او پر دوام او پراختیا یې ټینګار کوي.
د والیبال لوبغاړی شفق الله وايي: « دا ټورنمېنټ د زندانیانو د ذهني آرامۍ لپاره جوړ شوی او د زندانیانو د خوشالۍ لپاره یوه وسیله ده.»
د والیبال ستوری وايي: « موږ د محبس له چارواکو غوښتنه کوو چې دا ډول نورې لوبې هم په لاره واچوي، ترڅو دوی ته تفرېح برابره او د نشه يي توکو له کارولو مخنیوی وشي.»
د یادونې وړ ده چې اوسمهال د ننګرهار په زندان کې د ورزشي پروګرامونو تر څنګ د حرفوي او دیني زده کړو مرکزونه هم فعاله دي چې زندانیانو ته په کې روزنه ورکول کېږي.
