په ننګرهار کې د دې ولایت په کوربه توب د ۱۴ ولایتونو ترمنځ د بایسکېل ځغلونې ملی ټاکنیزو سیالیو پایلوبې مراسم جوړ شول.
مسوولین وايي، په دې سیالیو کې له ۵۵ لوبغاړو څخه ۲۵ تنو ملي لوبډلې ته لار پیدا کړې.
د ننګرهار بدني روزنې ریاست ویاند شاهد الله فضلي وايي: « د هېواد د ۱۴ ولایتونو ترمنځ د بایسکېل ځغلولو ملي سیالۍ ترسره شوې او نن یې پایلوبه وه. په دې سیالیو کې ټولټال ۵۵ تنو ګډون کړی و چې له ډلې یې ۲۵ تنو ملي سیالیو ته لاره پيدا کړه.»
د بایسکېل ځغلونې ملي فډراسیون روزونکي وايي، له دغو سیالیو یې موخه د غوره لوبغاړو ټاکنه ده، ترڅو په نړیوالو ډګرونو کې د افغانستان لپاره ښې لوبې وکړي.
د بایسکېل ځغلونې فډراسیون روزونکی اېمل نبي زاده وايي: « له دې سیالیو څخه د هغو ۲۵ تنو ټاکنه وه چې له مرکز او ولایتونو څخه به ټاکل کېږي، ترڅو په نړیوالو لوبو کې برخه واخلي. په دې سیالۍ تاسو ګورئ چې یاد ۲۵ تنه چمتو شول.»
د دې سیالیو له لارې ملي لوبډلې ته لاره موندونکي لوبغاړي ډاډ ورکوي چې د هېواد لپاره به ښې لوبې کوي. دوی دغه راز له خلکو او مسوولو ادارو د لا زیات ملاتړ غوښتنه هم کوي.
د بایسکېل ځغلونې لوبغاړی نقیب الله وايي: « د راتلونکي لپاره ډېر پروګرامونه لرم، دولت باید له موږ ملاتړ وکړي، ترڅو په نړیوالو لوبو کې برخه واخلم.»
د بایسکېل ځغلونې بل لوبغاړی عادل وايي: « ما په دې لوبو کې شپږم مقام خپل کړ او ملي ټیم ته شامل شوم. زه له چارواکو او ولس غواړم موږ ته د سیالیو زمینه برابره کړي، ترڅو موږ هم هېواد ته ویاړونه راوړو.»
د یادونې ده چې دا څلور ورځنۍ سیاليۍ له کابله، لغمان او له لغمان ولایت څخه بیا تورخم او ګمبیري دښتې پورې ترسره شوې.
