د پکتیا او خوست ولایت زرګونه خلکو او چارواکو د فوټسال له ۱۷ کالو کم عمره لوبډلې د اتلولۍ ستايلو په موخه، اتلو لوبغاړو ته ګلان ورکړل.
د هرکلي ګډونوال وايي،ورزش تل افغانان په يوه ټغر راټول کړي او د واحد ملت په توګه يې هېڅوک پر قومونو نه شي وېشلی.
د خوست اوسېدونکی شاهین الله شاهین وايي: « موږ له دغو لوبغاړو مننه وکړه، ځکه دوی هېواد ته خوشالي راوړې وه. افغانستان د ټولو کور دی او په هره لوبډله کې څومره لوبغاړي دي، دا د افغانستان لوبغاړي دي او حق یې دی چې د هېواد په هره څنډه کې ونازول شي.»
د خوست بل اوسېدونکی رحمت الله مخلص وايي: « موږ ته قوم، ژبه، سمت او نژاد مهم نه دي بلکې د افغانستان د افتخار او ویاړ لپاره د هر قوم تقدیر او ستاینه کوو.»
اخوا د فوټسال تنکيو ځوانانو ملي لوبډلې غړي وايي، د ولس دا ډول ملاتړ به يې په راتلونکي کې نورې اتلولۍ هم يقيني کړي.
د فوټسال ملي لوبډلې لوبغاړی قیس میاخېل وايي: « د خوست له خلکو مننه کوم چې زموږ یې تود هرکلی وکړ، زموږ قهرماني د ټولو لپاره وه او ټولو ته مبارکي وایم.»
د فوټسال ملي لوبډلې لوبغاړی معراج عزیزي وايي: « د خدای شکر د موږ وکولی شول چې د اتلولۍ مډال افغانستان ته راوړو او ثابته مو کړه چې موږ په هره برخه کې بریاوې لرو.»
د فوټسال ملي لوبډلې لوبغاړی محمد نعیم رحمت زاده وايي: « د ښکلي خوست له ښایسته خلکو او چارواکو ځانګړې مننه کوم، موږ ته یې ډېر قدر راکړ. له ټولو ځوانانو غوښتنه کوم چې هڅه وکړي له هر ډګر د افغانستان لپاره بریاوې راوړي.»
د افغانستان د فوټسال له ۱۷ کالو کم عمره لوبډلې خپله لومړنۍ لوبه ۱۰ د ۲ په مقابل کې له ازبېکستان وګټله. دویمه لوبه یې له کوربه بحرین ۷ پر صفر وګټله. درېیمه لوبه کې یې چین ته څلور پر ۱ ماتې ورکړه. په څلورمه لوبه کې چې نیمه پایلوبه هم وه، په لوی توپیر ۹ ګولونه د یو ګول په بدل کې د ټایلنډ په وړاندې بریا ترلاسه کړه او په پایلوبه کې یې هم د ایران ټیم دوه پر یو ګولونه مات کړ.
