افغانستان پر ګڼو قومونو او پرګنو سربېره ګڼې محلي ژبې هم لري چې د هېواد ملي فرهنګ په بډاینې کې مهم رول لري.
تازه د سمنګانو په مرکز ایبک ښار کې د ازبېکي ژبې د نمانځنې مراسم ترسره شول چې دینې عالمانو، فرهنګیانو او سیمه ییزو مسوولینو په کې برخه اخیستې وه.
د دې مراسمو ګډونوال او مسوولین د ملي یووالي لپاره د هرې ژبې او قومونو پر ارزښتونو ټینګار کوي او زیاتوي چې ټولو ژبو او قومونو ته درناوی د ملي یووالي بنسټ دی.
د مراسمو جوړونکی عبدالبصیر فرقاني وايي: « زموږ موخه اتحاد او همستګي ده. موږ د افغانستان قومونه که اتحاد ولرو، زموږ د ملت لپاره همدا بریالیتوب کېدای شي.»
د سمنګان د اطلاعاتو او فرهنګ ریاست د هنر او فرهنګ آمر عبدالخلیل جاوید وايي: « کوم قومونه چې په افغانستان کې ژوند کوي، سره وروڼه دي او په هر څه کې مساوي حق لري.»
په ورته مهال، د مراسمو یو شمېر ګډونوال او فرهنګیان په مورنۍ ژبه زده کړې د زده کوونکي مسلم حق بولي او وايي، په دې برخه کې پر ازبېکي ژبه د کتابونو له کمښت سره مخ دي. دوی په دې ژبه د کتابونو چاپولو او ښوونځیو کې د وېشلو غوښتنه کوي.
فرهنګ پوه عنایت الله یاسیني وايي: « دوی د قرآن، حدیث او ساینس له پلوه حق لري چې ماشومان یې په خپله مورنۍ ژبه زده کړې وکړي. دا ښه خبره ده چې دا مهال د افغانستان په پوهنتونونو کې د ازبېکې ژبې څانګې شته دي، خو بسنه نه کوي. زموږ غوښتنه دا ده چې د ازبېکې ژبې چاپ او تدریس ته جدي پاملرنه وشي.»
د نمانځغونډې ګډونوال سفر محمد وايي: « تر ټولو مهمه دا ده چې په خپله ژبه چاپ شوي کتابونه ولرو. موږ له چارواکو غوښتنه کوو چې د ازبېکي ژبې کتابونه په لوړ کیفیت چاپ او تر زده کوونکو ورسوي.»
د ازبېکي ژبې نمانځغونډې یوه څنډه کې د ازبېکي ژبې ډبرلیکونه، لاسي صنایع، جامې، دودیز خواړه او ورته نور توکي نندارې ته اېښودل شوي، ترڅو خلک د دې ژبې ګړېدونکو خلکو له فرهنګ سره وپېژني.
