د جلغوزیو کلنی فېسټیوال چې د کاپیسا ولایت د اطلاعاتو او فرهنګ ریاست له خوا د یوه رسمي فرهنګي جشن په توګه ثبت شوی، د نجراب ولسوالۍ په غورث دره کې یې کلنی فېسټیوال یا جنشنواره جوړه شوه.
په دې جشنواره کې د نجراب یو شمېر اوسېدونکو د تورجلغوزي د ونو پرېکولو په اړه اندېښنه وښوده او یې وویل چې دا کار د دې ونو شمېر ورځ تر بلې کموي.
دوی له اړوندو مسوولینو وغوښتل چې د ونو پرېکولو د مخنیوي لپاره جدي اقدامات وکړي او همداراز د جلغوزي د محصولاتو لپاره په نړیوالو بازارونو کې د خرڅلاو زمینه برابره کړي.
د نجراب ولسوالۍ اوسېدونکی عبدالرازق وايي: « غوښتنه کوو چې د کاپیسا ولایت د جلغوزو محصولاتو د پلورنې په اړه جګ پوړي چارواکي لاس په کار شي، ترڅو خلکو ته یې ګټه ورسېږي.»
د نجراب ولسوالۍ اوسېدونکی عبدالفتاح وايي: « د وخت او زمان د مشرانو د بې احتیاطۍ او نه پاملرنې له امله، د جلغوزیو ونې له ریښې و ایستل شوې، پرې شوې او ساتنې ته یې پاملرنه ونه شوه. موږ له دوی ګیله لرو چې ولې یې دغه ګران بیه محصول ونه ساته.»
په ورته مهال، د کاپیسا د اطلاعاتو او فرهنګ رییس کریم الله وثیق وايي، د دې جشنوارې هدف له خلکو سره همکاري او د جلغوزي د محصولاتو لپاره د بازار موندنې زمینه برابرول دي. نوموړي له خلکو وغوښتل چې د دې ونو له بې رویې پرېکولو ډډه وکړي.
د کاپیسا د اطلاعاتو او فرهنګ رییس کریم الله وثیق وايي: « موخه همدا ده چې موږ څنګه کولی شو د دې محصول لپاره بازار موندنه وکړو. څنګه کولی شو په ملي او نړیوالو بازارونو کې یې ځای وساتو او څنګه کولی شو د ملي او نړیوالو سوداګرو پښه تر دې ښایسته درو پورې را کش کړو.»
د کاپیسا ولایت د شاعرانو او لیکوالانو انجمن رییس محمد اکرم خاموش وايي: « دا د افغانستان اسلامي امارت دنده ده چې د جلغوزیو سوداګرۍ په پراختیا کې فعاله ونډه واخلي او د نجراب خلک د دې محصول له ګټو برخمن کړي.»
د نجراب ولسوالۍ د کرنې مدیریت په وینا، په دې ولسوالۍ کې شاوخوا ۱۰.۵ زره هکټاره د جلغوزي باغونه شته او تر دې دمه ۱۵ زره نوي نیالګي باغدارانو ته وېشل شوي دي.
