د خوست او نورو بېلابېلو ولایتونو ور اخوا له کوزې پښتونخوا د ۱۰ لوبډلو ترمنځ د والیبال سیالۍ پيل شوې چې شاوخوا یوه نیمه میاشت به روانې وي.
مسوولان وایي، موخه يې په خوست کې د ځان وژنې وروستیو پېښو پر وړاندې خلکو ته د سالمې تفریح برابرولو ترڅنګ د مختلفو سیمو د لوبډلو او لوبغاړو وړتیاوې لوړول دي.
د سیالیو جوړونکی اسماعیل سالار وايي: « زموږ موخه دا ده چې دا څه موده کېږي خوست کې ځان وژنې پيل شوې، موږ غواړو د خلکو فکر او ذهن سپورټ ته را واړوو، ترڅو له ځان وژنې ډډه وکړي؛ ځکه ځان وژنه حرامه ده. له مشرانو مو هیله ده چې خپل ځوانان تشویق کړي، ترڅو په سالم ورزش بوخت شي.»
د خوست بدني روزنې آمریت آمر عطاءالله کډوال وايي: « د دې سیالیو لومړي مقام ته به مارک اېکس موټر او دویم مقام ته الټو موټر جایزه ورکول کېږي. د دغو لوبغاړو اعاشه هم ورکول کېږي او ټول ترتیبات ورته نیول شوي دي.»
اخوا لوبغاړي هم د مختلفو سیمو او ولایتونو ترمنځ دا ډول لوبې ګټور ګام یادوي او زیاتوي چې ځوان لوبغاړي به د دې سیالیو له لارې له تجربه لرونکو لوبغاړو نوې مهارتونه زده کړي.
لوبغاړی منتظر حسین وايي: « نن د پاکستان ټیم په مقابل کې تدارکاتي مسابقه لرو، څه کوو دا لوبې وګټو.»
د والیبال لوبغاړی عدنان خان وايي: « موږ ښکته پورته ټول یو پښتون یو، دې کې بله خبره نه شته. ستاسو لوبغاړي ډېر تکړه دي، که چېرې حکومت اسانتیاوې ورته برابرې کړې، افغانستان به ډېر غټ نوم ولري.»
د پښتونخوا لوبغاړی احسان الله احسان وايي:« دا د خوست خلکو لپاره ډېر د ویاړ ځای دی چې دا ډول ټورنمنټ یې جوړ کړی. په دې کې هم د کوزې پښتونخوا او هم د افغانستان د بېلابېلو ولایتونو لوبډلې په کې برخه لري.»
د خوست او کوزې پښتونخوا د لوبغاړو دا ګډې سیالۍ داسې مهال ترسره کېږي چې د پاکستاني حکومت وروستیو محدودیتونو له امله د قبایلې سیمو او خوست ولایت خلکو ترمنځ د نورو اړیکو ترڅنګ، په ورزشي فعالیتونو هم منفي سیوری غوړلی.
