د کرېکټ بورډ چارواکو د نړیوالو او کورني کرېکټ د ودې لپاره د تازه پیل کېدونکو سیالیو په اړه مالومات شریک کړل.
دوی وایي، د روانې اګسټ میاشتې په ۲۰مه نېټه به په خوست ولایت کې د پنځو لوبډلو ترمنځ د سږ کال لېسټ اې یو ورځنۍ سیالۍ پیل او د سپټمبر تر ۶مې به دوام وکړي.
د کرېکت بورډ د کورني کرېکټ مسوول جارعبدالرحیمزی وايي: « لېست اې سیالۍ به دا ځل په خوست ولایت کې وشي. باید یادونه وکړم چې په دې سیالیو کې به پنځه ټیمونه برخه ولري او هر ټیم به د یوه زون استازیتوب کوي، لکه سپین غر، بند امیر، مس عینک، آمو او بست. په دې لوبو کې به د ملي لوبډلې د پنځوس اوریز فارمټ ډېری لوبغاړي ګډون ولري. دا لوبې به د روانې اګسټ میاشتې په ۲۰ پيل شي او د سپمټمبر تر ۶ به ادامه ولري. هره لوبډله به له پایلوبې وړاندې ۶ لوبې ولري او د پایلوبې په ګډون به ټولې ۱۶ لوبې وشي.»
د لوبغاړو غوراوي کمېټه بیا د افغانستان، پاکستان او متحد عربي امارتو د کرېکټ ملي لوبډلو ترمنځ د را روانې درې اړخیزې لوبلړۍ او اسیا جام سياليو لپاره د ملي لوبډلې د چمتوالي خبر ورکوي او وایي، په دې موخه د تمریناتي کمپ پيلولو لپاره ۲۲ لوبغاړي غوره شوي دي.
د لوبغاړو د غوراوي کمېټې مشر احمدشاه سلیمانخېل وايي: « افغانستان یوه درې اړخیزه لوبلړۍ لري چې په کې افغانستان، عربي متحده امارات او پاکستان ګډون لري. دا لوبې به په عربي متحده اماراتو کې د اګست له ۲۱ مې د سپټمبر تر ۷ نېتې ترسره شي. له هغې وروسته بیا آسیا کپ دی چې د سپټمبر پر ۹ مه به پیل شي. د دې لپاره د لوبډلمشر راشد خان او عمومي روزونکي په مشوره ۲۲ کسیز نوملړ یا سکواډ جوړ شوی دی.»
ټاکل شوې سږ کال د اسیا جام سیالۍ د راتلونکې سپټمبر پر ۹مه د متحده عربي امارتو د ابوظبۍ په شیخ زاید لوبغالي کې د افغانستان او هانګ کانګ لوبډلو ترمنځ په سیالۍ سره پیل او د همدې میاشتې تر ۲۸مې نېټې به دوام وکړي.
په دې جام کې به د پایلوبې په ګډون ټولټال ۱۹ سیالۍ ترسره شي.
