د اتصالاتو مخابراتي شرکت د راتلونکي یوه کال لپاره د افغانستان کرېکټ د عمومي مالي ملاتړ حقوق ترلاسه کړل.
په همدې موخه د افغانستان کرېکټ بورد او اتصالاتو مخابراتي شرکت ترمنځ هوکړه هم لاسلیک شوه چې له مخې به یې ياد مخابراتي شرکت د کرېکټ ملي لوبډلې او کورني کرېکټ ټولو سیالیو مالي ملاتړ کوونکی وي.
د کرېکټ بورد مشر میرویس اشرف وايي: « د اتصالاتو او افغان کرېکټ بورډ ترمنځ د همکاریو ډېر اوږد سفر دی او دا سفر به لاهم ادامه ولري. موږ باید له اتصالات شرکت خاصه یادونه او مننه وکړو چې له لومړیو او سختو ورځو راهیسې یې د افغانستان د کرېکټ بورډ ملتیا او مالي ملاتړ کړی.»
د اتصلاتو مخابراتي شرکت بیا د کرېکټ بورډ د مالي ملاتړ ډاډ ورکوي او وايي، راتلونکي کې به هم دغه ملاتړ ادامه ولري.
د اتصالاتو مخابراتي شرکت حقوقي رییس سید خالد عزیز وايي: «موږ هیله لرو او ژمنه کوو چې له کرېکټ بورډ د اتصالاتو مالي ملاتړ به راتلونکي کې هم ادامه ولري. دا مالي ملاتړ د دواړو اړخونو پر ګټه دي، هم د اتصالاتو مخابراتي شرکت پر ګټه دی؛ ځکه چې کله زموږ لوبډله په نړیوالو میدانونو کې لوبېږي، نو د افغانستان دا برنډ خلکو ته ورښيي. په ورته وخت کې دا د کرېکټ بورډ لپاره هم یو مالي ملاتړ دی چې موږ یې دوی ته ورکوو.»
که څه هم د کرېکټ بورډ چاراکو د دې مالي ملاتړ ارزښت په ډاګه نه کړ، خو زیاته يې کړه چې اتصالات مخابراتي شرکت به یې د ټولو نړیوالو او داخلي لوبو مالي ملاتړ کوي.
