د خوست ولایت په اماني فوټبال لوبغالي کې د دې ولایت د اتو مخکښو لوبډلو ترمنځ د مهاجر فوټبال لیګ سیاليو نږدې ۱۵ ورځې دوام درلود.
ولایتي مسوولین وایي، له دې لیګ موخه افغانستان ته له ګاونډیو هېوادونو د راستنېدونکو افغانانو ملاتړ او ورسره د فوټبال سوداګریزو لوبو پراختیا وه.
د خوست فوټبال فېډراسیون رییس ریبار هڅاند وايي: « دا چې په دې وروستیو کې افغانستان ته زیات شمېر کډوال راستانه شول، هغوی ته د مورال ورکولو په نیت مو دغه لیګ ته د مهاجر لیګ نوم ورکړ، ترڅو وښیو چې ولس او حکومت له دوی سره دي.»
د فوټبال ځینې لوبغاړي هم په دې ولایت کې د فوټبال د ودې لپاره د سوداګریزو لیګونو جوړول مهم ګڼي او زیاتوي، که په یاده برخه کې سوداګر وهڅول شي، دا به د ډېرو استعدادونو په موندولو او پرمختګ ته د لوبغاړو په هڅولو کې مرسته وکړي.
د فوټبال لوبغاړي عتیق الله لکڼوال وايي: « موږ له سوداګرو غوښتنه کوو چې خوست کې دا ډول لوبو ته پاملرنه ډېره کړي. دا ډول سیالۍ کولی شي خوست کې فوټبال ته وده ورکړي او دغه راز د ځوانانو ترمنځ یوالی، اتحاد او انسجام رامنځته کړي.»
د فوټبال لوبغاړی الیاس منګل وايي: « دا ډول تجارتي لیګونه باید نور هم جوړ شي او سوداګر یې ملاتړ وکړي. د خوست خلک له سپورټ سره ډېره مینه لري، په ځانګړې توګه فوټبال سره. که دا ډول ټورنمنټونه نور هم جوړ شي، هر ځوان به هڅه وکړي چې ونډه په کې ولري.»
خوست کې د فوټبال یادو سیالیو له پای ته رسیدو سره هم مهاله، ولایتي چارواکو او مسوولینو ډاډ ورکړ چې په دې ولایت کې به د سوداګریزو لیګونو جوړولو ته پاملرنه لا ډېره کړي، ترڅو لوبغاړو ته د عایدو ترلاسه کولو او لوبو ښه فرصتونه رامنځته شي.
