۱۴۰۴ لمریز کال کې د هرات- خواف رېل پټلۍ له لارې د لومړي ځل لپاره د وچې مېوې سوداګریزه جوپه اروپا ته صادره شوه.
دا جوپه چې د ترکیې هېواد له لارې به اروپا ته ورسېږي، په کې د ۱.۲ میلیونو ډالرو په ارزښت ۲۰۰ ټنه وچه مېوه ځای پرځای شوې ده.
د هرات صادروونکو ټولنې مرستیال مهدي اکرمي وايي:« موږ نن ورځ اته لارۍ بار د ترکیې په مقصد او بیا له هغه ځایه اروپا ته د صادرولو په موخه بار کړل. په دې کې د افغانستان شاوخوا ۲۰۰ ټنه وچې مېوې شاملې دي چې د ټول افغانستان له مختلفو برخو راټولې شوې دي. دغه بار به د رېل پټلۍ له لارې ایران، ترکیې او بیا اروپا ته ورسېږي.»
سوداګر عبدالاحد نظریان وايي:« په هغو صادراتو کې چې تېر کال له هرات ولایت شوي، په ټولیزه توګه ۱۶۴ میلیونه ۸۲۰ زره ډالرو په ارزښت د نړۍ مختلفو هېوادونو ته صادر شوي چې د تېر کال په پرتله ۲۹ سلنه زیاتوالی ښيي.»
ځايي مسوولین له هرات ولایت څخه نورو هېوادونو ته د صادراتو وضعیت د پخوا په پرتله ښه ګڼي او وايي، د صداراتو د زیاتوالي او اړیکو د پراختیا لپاره به خپلې هڅې جاري ساتي.
د هرات والي نور احمد اسلام جار وايي: « د صادراتو په اړه د نړۍ له هېوادونو سره ښې خبرې روانې دي. د سیمې پر کچه د اماراتو، چین، روسیې، قزاقستان، ترکمنستان، پاکستان، هندوستان او د سیمې له ټولو هېوادونو سره د افغانستان د صادراتو په اړه خبرې روانې دي. په دې تړاو یوازې زموږ او ستاسو ترمنځ ډېرو ناستو او د دغو خبرو اترو تعقیب ته اړتیا ده.»
د یادونې وړ ده چې له افغانستانه ډېری کرنیز محصولات او لاسي توکي آسیایي، امریکایي او اروپایي هېوادونو ته صادریږي.
