د افغانستان بانک او مالیې وزارت ترمنځ په برېښنایي بڼه د عوایدو را ټولولو، د دولتي لګښتونو د اجرا کولو او دولتي کارکوونکو ته د معاشونو اداینې په موخه، هوکړه لیک لاسلیک شو.
د دې هوکړې له مخې به د افغانستان بانک د مالي او اداري مالوماتي سیسټم فعالوي چې په وسيله به يې ټول دولتي لګښتونه په برېښنايي توګه تاديه او برعکس به عوايد هم د اړوند ادارو له لوري په ورته بنه راټولېږي.
د افغانستان بانک چارواکي د دې سیسټم فعالېدل لاسته راوړنه بولي او زیاتوي چې په دې سره به د عوایدو په راټولولو کې شفافيت رامنځته شي.
د افغانستان بانک لومړی مرستیال صدیقالله خالد وايي: « له دې وړاندې امارتي لګښتونه په منول ډول د چک له لارې لومړی د افغانستان بانک ته راتلل او بیا په منول ډول تجارتي بانکونو ته استول کېدل. په راتلونکي کې به دا پروسه په برېښنايي ډول د سیسټمونو له لارې ترسره کېږي او ټول سوداګریز بانکونه به له دې سیسټم سره وصل وي او د هېواد په ۳۴ ولایتونو کې فعالیت ولري.»
نوموړی همدا راز زیاتوي، د دې سیسټم په فعالېدو سره به ټول اجراات په نړیوالو معیارونو برابر او همدا راز به په فزیکي بڼه د پیسو کارول تر ممکنه کچې را کم شي.
د خالد په خبره، بله ګټه یې دا ده چې د پیسو د ژر زړښت او د نغدي لېږد رالېږد پرمهال به د احتمالي خطرونو مخنيوی هم وشي.
هغه په دې اړه وايي: « د الکټرونیکي تادیاتو سیسټم له پلي کېدو سره به ټول اړوند اجراات په نړیوال معیار برابر ترسره شي او همدارنګه د عوایدو، لګښتونو او معاشونو اجراآتي پروسې به معیاري او منظمې شي. د شفافیت، حساب ورکونې او مالي نظم لپاره د راپور ورکولو پرمختللي مکانېزمونه به پلي شي»
د مالیې وزارت چارواکي بیا وایي، له دې وړاندې به ملي عواید په فزیکي بڼه یا هم د بانکونو له لارې راټولېدل چې په یو شمېر لرې پرتو سیمو کې د بانکي خدمتونو د نه شتون له کبله خلک له ګڼو ستونزو سره مخ وو او په خبره یې، د نوي مالي او اداري مالوماتي سيسټم له فعالېدو وروسته به په اسانۍ سره دا چارې په برېښنایي بڼه ترسره کېږي.
د مالیې وزارت د ګمرکاتو او مالیاتو رییس شاه حسين حسیني وايي: « په اکثره ساحو کې د بانکي څانګو نه شتون او په فزیکي بڼه د عوایدو په راټولولو کې مختلفې ستونزې موجودې دي. له دې وروسته به د یادې تفاهم نامې پر بنسټ، د لومړي ځل لپاره ملي عواید په شفافه توګه په برېښنايي بڼه او په ټاکلي وخت راټولېږي. همدارنګه په عین وخت کې به د ماليې وزارت واحد حساب ته انتقالېږي. په برېښنايي ډول د عوایدو راټولول به مراجعانو ته هم زیات سهولتونه برابر کړي. دوی به وکولی شي په ډېر کم وخت او نږدې ساحه کې د تعرفې له لګښت پرته خپل مالیات او فیسونه تحویل کړي.»
د افغانستان بانک ډاډ ورکوي چې په ټولو ګمرکونو کې به سوداګرو ته د تادياتو په برخه کې اسانتیاوې رامنځته کړي، ترڅو وکولی شي تعرفې د تادیې د برېښنایي سیسټم(پي.او.اېس) له لارې په اسانۍ تحویل کړي.
