هرات ولایت کې د پیام نور نندارتون کې ۷۵ هنري آثار چې د ۴۰ استادانو له خوا جوړ شوي، د انځورګرۍ، خطاطۍ او سینګاري هنر (تذهیب) په برخو کې د خلکو پر مخ د څلورو ورځو لپاره نندارې ته وړاندې شوې دي.
د نندارتون جوړولو مسوول عبدالله عثماني وايي: « دغه نندارتون د مبارکې روژې په مناسبت جوړ شوی چې په کې د ۴۰ تنو استادانو ۷۵ هنري آثار نندارې ته وړاندې شوي دي. دغه آثار په درېيو برخو نقاشۍ، خوشنویسۍ او تذهیب په برخو کې دي. همدارنګه یو شمېر آثار د ښيښې پرمخ هم کار شوي او دلته نندارې ته وړاندې شوي.»
د هرات هنرمندان نندارې ته وړاندې شوي آثار ارزښتناک او د ستاینې وړ بولي او وايي، باید له دوی د ملاتړ لپاره منظم پروګرامونه طرح او عملي شي، ترڅو هنر په ټولنه کې وده وکړي.
د دوی په باور، له هنرمندانو لږ ملاتړ هم کولی شي د هنر د ودې او پراختیا لپاره ښې پایلې ولري.
د هرات د خطاطانو ټولنې رییس عبدالجلیل توانا وايي:« کله چې څوک د هنر په درشل پل ږدي او داسې پړاو ته رسېږي چې هنر تولید کړي، دې ته اړتیا پېښيږي چې نندارتون ورته جوړ شي او دوی په ملي او نړیوالو کچه نندارتونونو کې ګډون وکړي، آثار یې د کتابونو په بڼه چاپ شي، ترڅو دوی انګیزه پيدا کړي او د هنر د پرمختګ لپاره کار وکړي.»
د نګارستان بهزاد مدیر محمد ابراهیم حبیبي وايي: « دا نندارتون سل په سلو کې د هنر له ودې سره مرسته کوي، زموږ غوښتنه دا ده که خدای کول له افغانستانه د باندې نندارتون ولرو؛ داسې یو نندارتون چې هم د افغانستان د هنرماندانو لپاره ښه ګټه وکړي او هم د افغانستان هنري ټولنې ته ګټه ورسوي. د مثال په توګه، هغه نندارتون چې په دوبۍ کې جوړېږي. دا د شکر ځای دی چې موږ په هېواد او په ځانګړې توګه هرات کې ډېر ښه او ناب هنري آثار لرو.»
له بلې خوا، د هرات ځايي چارواکي د هنر او هنرمندانو د ملاتړ پر اهمیت ټینګار کوي او وايي، په اطلاعاتو او فرهنګ وزارت کې پر لوړه کچه د هنرمندانو د ستونزو هوارولو او د هنر د ودې لپاره هڅې روانې دي.
د هرات د اطلاعاتو او فرهنګ رییس احمدالله متقي وايي: « د افغانستان اسلامي امارت ټول هنرمندان او ټول هغه کسان چې د هنر او فرهنګ په برخه کې ملت ته خدمت کوي، د هڅولو او تشویق لپاره یې برنامې لري، د ستونزو د حل لپاره یې کار کوي، موږ به دوی نور هم تشویقوو، امکانات به ورته برابروو او په لنډه موده کې د دې کوشش کوو چې دغو هنرمندانو ته په نړیواله کچه یو نندارتون جوړ کړو.»
دا په داسي حال کې ده چې موده وړاندې د خطاطانو ملاتړ په موخه د هرات په اختیارالدین کلا کې د خطاطۍ او هنري آثارو دایمي نندارتون هم پرانیستل شو.
