د بلخ ولایت د نساجۍ او ټوکر تولیدولو کارخونه ۳۳ کاله وړاندې له کاره غورځېدلې او په دې موده کې يې ډېری برخې ویجاړې شوې.
د کارخونې مسوولین وایي، له شاوخوا درېيو کالونو هڅو وروسته یې د افغان انجینرانو پر مټ د ترمیم چارې ۹۵ سلنه بشپړې شوې.
د دوی په خبره، ډېر ژر به يې پاتې برخې هم ترمیم شي او له فعالېدو سره سم به په کې شاوخوا۲ زره کسان پر کار بوخت شي.
د کارخونې مشر عبدالغفار حقاني وايي: « الحمد الله د دې رنګمالي چې موږ تاسې ولیدل او پرې وګرځېدلو، په ۱۰۰ کې ۹۵ سلنه فعاله ده، یوازې د برېښنا لینونه یې څه کمزوري دي، هغه مو راغوښتي خو تر اوسه را رسېدلي نه دي؛ هر وخت چې را ورسېد، انشاالله تاسو به یې وګورئ چې ټوله به چالانه وي.»
د کارخونې مسووولین وايي که کارخونه له ترمیم وروسته په بشپړه توګه فعاله شي، نه یوازې زرګونه کسانو ته به په کې د کار زمینه برابره شي، بلکې د شمال زون ولايتونه به د ټوکر له پلوه هم پر ځان بسیا شي.
د دوی په خبره، دغه کارخونه په کلني ډول د ٢١ میلیونه متره ټوکر د تولید ظرفیت لري، خو اوس یې ډېری ماشینونه له کاره لوېدلي او د شته ماشینونو له ترمیم وروسته کولی شي په کلنۍ توګه تر درې میلیونو مترو ټوکر تولید کړي.
د کارخونې د سوداګرۍ او پلان جوړولو آمر عبدالرحمن وايي: « زموږ د رنګولو ماشین دا مهال د بیا رغونې په حال کې دی او زموږ د تار اوبدلو ماشینونه به په نږدې راتلونکي کې بېرته ورغول شي. که چېرې زموږ ماشین آلات بدل شي، نوي ماشینونه راشي یا هم دا موجوده ماشینونه په اساسي توګه ورغول شي، دلته تر ۱ زر ۵۰۰ کسانو پورې د کار زمینه برابرېږي او کولی شي په درېیو منظمو کاري وختونو کې کار وکړي. موږ کولی شو دلته په تولید شوي ټوکر باندې شمالي ولایتونو ځان بسیا کړو.»
هغوی چې له لسیزو راهیسې په دې کارخونه کې کار کوي وايي، یو مهال له دې کارخونې بهرنیو هېوادونو ته هم ټوکر صادرېدل.
دوی باور لري، که له ترمیم سربېره ورته نوي ماشینونه واخیستل شي، نو د دې وړتیا لري چې له بهرنیو تولیداتو سره سیالي وکړي.
د کارخونې مالي او اداري آمر فیض محمد وايي: «په دې کار کې موږ هغه ماشیونه ترمیم کړي چې له کاره لوېدلي وو، بل ځای مو نه دي وړي خپله مو ترمیم کړي. خو په دې کې داسې برخې هم شته لکه د لابراتوار څانګه چې تر اوسه برابر نه دي. کله چې دا ماشینري جوړه او فعاله شي، بیا به د لابراتوار لپاره هم انجینر وغواړو ترڅو د هغوی تخنیکي چارې موږ ته راوښيي ترڅو موږ تولید پيل کړو. تر اوسه مو دا لوی ماشین فعال کړی دی.»
د بلخ د نساجۍ دغه دولتي کارخونه د محمد ظاهر شاه د واکمنۍ پر مهال په ١٣٤٧ لمریز کال جوړه شوه، خو له ٣٠ کلن فعالیت وروسته د کورنیو جګړو پرمهال یې فعالیت بند شو. اوس د دې کارخونې د بيا فعالولو لپاره هڅې پيل شوې دي.
