د افغانستان فوټبال له ۱۷ کلون کم عمره ملي لوبډلې د مځنۍ آسیا د کافا جام په سیالیو کې ازبېکستان ته په ماتې ورکولو سره د دې ټورنمېنټ د اتلولۍ له ګټلو وروسته پرون دوشنبه د (۱۴۰۳ کال د وږي پر ۵ مه ) هېواد ته راستنه شوه.
د دغې لوبډلې هرکلي ته د فوټبال فډراسیون مسوولین، دولتي چارواکي او مینه وال د کابل هوايي ډګر ته ورغلي وو.
د المپیک ملي کمېټې مسوولین په افغانستان کې د هرې لوبې د ملاتړ خبره کوي او زیاتوي، چې د فوټبال ټیم د لا پیاوړتیا په برخه کې به خپلې هڅې دوامداره ساتي.
د المپیک ملي کمېټې عمومي رییس حمد الله وثیق وايي: « حکومت له سپورټ څخه پوره ملاتړ کوي. زه د بدني روزنې او سپورټ ادارې په استازیتوب د افغانستان ټولو سپورټي فډراسیونونو او په ځانګړې توګه هغوی ته، چې افغانستان ته یې ویاړونه راوړي، ډاډ ورکوم، چې د سپورټ اداره به خپل ټول امکانات ستاسو په واک کې درکړي.»
په ورته مهال، د فوټبال فډراسیون وایي، د فډراسیون هلې ځلې او د لوبغاړو پوره چمتوالی لامل شو، چې د هېواد د فوټبال له ۱۷ کلونو کم عمره ملي لوبډله د منځنۍ آسیا فوټبال جام سیالیو اتلولي وګټي.
د فوټبال فډراسیون رییس محمد یوسف کارګر وايي: « له نېکه مرغه په دغو شرایطو کې د دوی شتون له لاسته راوړنو ډک و. زموږ د ۱۷ کلنو ملي لوبډله د منځنۍ آسیا په شپږو لوبډلو کې تر ټولو پياوړې لوبډله وه او له نېکه مرغه اتلولي یې هم وګټله.»
له دې سره، د فوټبال ټیم ملي لوبغاړي هم په دې بریا خوښي ښيي او د فوټبال له فډارسیون او اسلامي امارته غواړي، چې د فوټبال ټیم ملاتړ وکړي، ترڅو په راتلونکي کې په لوړ مورال ولوبېږي او دې ته ورته نورې بریاوې خپلې کړي.
د فوټبال له ۱۷ کلونو کم عمره ملي لوبډلې لوبډلمشر حامد وايي: « موږ ټول ډېر خوښ یو او د افغانستان ټول ملت ته د دې اتلولۍ مبارکي ورکوم او له هغو ټولو کسانو مننه کوم، چې زموږ ملاتړ یې وکړ. زه له حکومت غوښتنه کوم، چې زموږ ملاتړ وکړي،ترڅو بیا هم اتلولي وګټي.»
د فوټبال له ۱۷ کلونو کم عمره ملي لوبډلې لوبغاړی شکېب امیري وايي: « موږ ډېر زحمت ایستلی و او له پوره چمتوالي سره تللي وو، اتلولي مو وګټله او تمه لرو، چې راتلونکې کې هم اتلولي وګټو.»
همدارنګه د لوبډلې یو بل لوبغاړی ساحل سروري بیا وايي: « موږ له حکومت غوښتنه کوو، چې زموږ ملاتړ وکړي، ترڅو له دې لارې هېواد ته ویاړونه راوړو.»
د منځنۍ آسیا کافا فوټبال جام دا سیالۍ له ۱۷ کلونو کم عمره ځوانانو ترمنځ د تاجیکستان په کوربتوب ترسره شوې.
په ۲۰۲۴ زیږدیز کال دغو سیالیو کې افغانستان، ایران، تاجیکستان، ازبېکستان، ترکمنستان او قرغیزستان سره مخ و.
افغان لوبډلې تېر کال په دې سیالیو کې درېیم مقام ګټلی و او په لومړي ځل یې سږ کال اتلوالي هم خپله کړه.
