په خوست ولایت کې له پاکستانه د بېرته راستنیدونکو افغان کډوالو په ملاتړ د کرېکټ سیالۍ پيل شوې، ۱۲ لوبډلې په کې برخه لري او شااوخوا ۱۰ ورځې به دوام وکړي.
د خوست کرېکټ پرمختیايي ادارې مطبوعاتي مسوول اکبر علي سمون وايي، په دغو سیالیو کې به د بېلابېلو پیغامونو او شعارونو پرمټ خلک د افغان کډوالو همکارۍ او ملاتړ ته وهڅول شي.
سمون زیاتوي:«د دې سالیو ګټه دا ده چې جهان سازي به وشی، د افغان کډوالو د راستنېدو په اړه به بېلابېل شعارونه وړاندې شي او ترڅنګ به یې هغه لوبغاړي چې اوس مهال داخلي سیالۍ ونه لري دوی به دلته بوخت وساتل شي او همداشان د ملي او ۱۹ کلنو لوبغاړو څخه به زموږ داخلي لوبغاړو ته تجربې ولېږدول شي.»
اخوا په دغو سیالیو کې یو شمېر لوبېدونکي لوبغاړي که څه هم دا ډول سیالۍ د افغان کډوالو د رواني ستونزو د مخنیوي لپاره مهمې ګڼی خو ترڅنګ یې پر نړیوالو او داخلي مرسته کوونکو ادارو غږ وکړ چې له پاکستانه پر زور او جبر سره د اېستل شویو افغان کډوالو لپاره دې په بېلابېلو برخو کې د لاسنیویي هڅې وشي او ژر تر ژره دې یادو کډوالو ته د ژوند لومړني امکانات برابر شي.
لوبغاړی ایمل شاهین وايي:« د کډوالو لپاره پر نړیوالو هم غږ کوو او دلته په هېواد کې هم پر پانګه والو باندې هم غږ کوو چې دوی مرسته وکړي.»
یو بل لوبغاړی صفي الله وايي: « دا سیالۍ له پاکستانه د راستنېدونکو کډوالو سره د مرستې لپاره جوړې شوې دي.»
دا په داسې حال کې ده چې له پاکستانه په زور د افغان کډوالو د اېستلو موضوع په افغانستان کې دننه او بهر ګڼ شمر غبرګونونه را پارولي او د پاکستان دغه کړنه یې یو غیر انساني عمل بللې دی.
