د کرونا ویروس نږدې د نړۍ ۱۸۵ دولتونو او سیمو ته رسېدلی دی او په چټکۍ سره د خپریدو په حال کې دی.
کرونا ویروس یو شمیر هیوادونه د اقتصادي بحران سره هم مخ کړي دي. د اقتصاد تر څنګ ورزشي پرګرامونه هم ددغه ویروس د اغیز لاندې راغلي دي.
د کرونا ویروس د مخنیوي لپاره د نړۍ یو شمیر هېوادنو ځینې تدابیر نیولي دي:
د افغانستان حکومت د کرونا ویروس د مخنیوي په خاطر په مناسبتی مراسمو، د نورز په نمانځلو، په حمامونو او همدارنګه په ورزشي برنامو بندیز لګولی دی.
د هیواد د المپیک کميټې بیا په ټولو ورزشي برنامو بندیز لګولی دی.
د بزکشي سیالۍ چې د کابل په حضوری چمن کې ترسره کیدلي د کرونا ویروس څخه د مخنیوي په خاطر لغوه اعلان شوې.
همدارنګه په نړۍ کې هم په ورزشي برنامو بندیز لګیدلی دی.
د پاکستان کرکت سیالۍ چې تر نیمه پایلوبې پورې رسیدلې وې، د کرونا ویروس د مخنیوي لپاره بندې شوې دي.
او همدارنګه د انګلستان پریمیر لیګ، سیری اې، او د باسکټ بال سیالۍ هم د کرونا ویروس د مخنیوي په خاطر ځنډېدلې دي.
همداراز د انګلستان فوتبال کلپونو د خپلو لوبغاړو غوښتي چې خپل فیسونه ۲۵ سلنه را کم کړي.
د فوتبال کلپونو ویلي دي چې لوبغاړي به د امر ثانې پورې لوبې نه کوي نو له همدې وجهې باید خپل فیسونه راښکته کړي.
له بلې خوا، د انګلستان کرکت بورد خپلو ټولو لوبغاړو څخه غوښتي چې خپل ځانونه قرنطین کړي.
دا په داسې حال کې ده چې د ۲۰۲۰ کال د المپیک سیالۍ چې په جاپان کې ترسره کیږي، لا تر اوسه یې د ځنډیدو او یا نه ځنډیدو پرېکړه نه ده شوې.
په ورته وخت کې، ځینو لوبغاړو بیا د المپیک په نړیوالې کميټې غږ کړی چې د کرونا ویروس د مخنیوي په خاطر دې د ۲۰۲۰ کال المپیکي سیالۍ وځنډول شي.
خو د المپیک نړیوالې کمیټې ځینو چارواکو ویلي چې د ۲۰۲۰ کال المپیک سیالیو ته کابو څلور میاشتې پاتې دي او دوی د دغو سیالیو ځنډیدو په اړه اوس مهال پریکړه نشي کولی.
د المپیک سیالۍ در روان زږدیز کال د جولای په ۲۴ مه ترسره کیږي.
