هرات کې د برېښنايي څراغونو(ګروپونه) د تولید کوچنۍ کارخونه د یوې مېرمنې په نوښت او هڅو جوړه شوې او د پنځوس زره افغانیو په لومړنۍ پانګونه یې خپل فعالیت پیل کړی.
په دې کارځای کې د مېرمنو په لاس د څراغونو جوړولو کار پيل شوې، هغه کار چې په پیل کې ساده او محدود و، خو د وخت په تېرېدو سره یې د پام وړ پرمختګ کړی.
که څه هم د دې کارځای بنسټ له لږو امکاناتو سره اېښودل شوی، خو د پرله پسې هڅو حوصلې او ښه مدیریت له برکته، اوس د څراغونو جوړولو دا کاروبار دومره غوړېدلی چې شاوخوا له ۶۰ زیاتې نجونې په کې په کار بوختې دي.
پانګواله لیلا جامي وايي: « ما په خپلو هغو پیسو چې د خیاطۍ او غالۍ اوبدلو له لارې مې پيدا کړې وې، دلته مې پانګونه وکړه او دا دی اوس یو کال کېږي چې په خپل کارځای کې کار کوم. دلته کار کوونکو نجونو ته ۶میاشتې وړیا روزنه ورکول کېږي او کله چې کار زده کړي، بیا ورته معاش ورکوم. هره ورځ له سل تر یوسل شلو پورې څراغونه جوړوو او بیا یې بازار ته وړاندې کوو.»
په دې کار ځای کې په ورځني ډول ۱۵۰ تر ۲۰۰ بېلابېل ډول څراغونه جوړېږي او بازار ته وړاندې کېږي.
د چارواکو په خبره، د دې کارځای موخه یوازې سوداګریزه ګټه نه بلکې مېرمنو ته د کار، زده کړې او ځان بساينې زمینه برابرول هم ده. د دوی په وینا، دا ډول نوښتونه کولی شي د ټولنې په اقتصادي پیاوړتیا کې مهم رول ولوبوي او مېرمنې له اقتصادي پلوه پیاوړې کړي.
د څراغ جوړولو کارځای ښوونکې فرزانه محمدي وايي: « زموږ د تولیدي څراغونو بازار ښه ګرم دی؛ ځکه چې دا څراغونه لږ برېښنا مصرفوي او ښایسته ډیزاینونه لري. همدارنګه ښه روښنايي لري او له ماورا بنفش وړانګو خوندي دي.»
دلته په کار بوختې نجونې نه یوازې د کار له لارې عاید ترلاسه کوي بلکې د لامپونو د جوړولو مسلکي زدهکړه هم ترلاسه کوي، ترڅو په راتلونکي کې وکولی شي پر خپلو پښو ودریږي او خپلو موخو ته ورسېږي.
د هرات اوسېدونکې شریفه محمدي وايي: « یو کال کېږي چې دلته کار کوم او ډېره خوشاله یم چې د دې ټیم غړې یم.»
د هرات اوسېدونکې آلینا توخي وايي: « دا ډول کارځایونه باید ډېر شي، ځکه ښځې هم کولی شي د نرانو په څېر هر ډول کار ترسره کړي.»
د هرات اوسېدونکې الهام محمدي وايي: « په پيل کې مې له دې کار سره لېوالتیا نه وه، خو اوس راضي یم؛ ځکه کولی شي له ځان او کورنۍ سره مرسته وکړم.»
بله خوا، لوېدیځ زون کې د مېرمنو سوداګرۍ او صنایعو خونې مسوولان وایي، په پام کې ده هرات کې ښځو ته د کارموندنې او د هغوی اقتصادي ودې په موخه د مېرمنو اړوند سل کارځایونه هغوی ته د کسبونو زده کړې زمینه برابره کړې.
لوېدیځ زون کې د مېرمنو سوداګرۍ او صنایعو خونې رییسه بهناز سلجوقي وايي: « موږ چمتو یو چې دوی ته وړیا روزنه ورکړو. که د دوی مالي ملاتړ وشي او ښه امکانات په واک کې ورکړل شي، دوی کولی شي نور ډېر کارکوونکي هم جذب کړي. اسلامي امارت او دغه راز بهرني بنسټونه باید دغه شان امکانات د دوی په واک کې ورکړي.»
لوېدیځ زون کې د مېرمنو سوداګرۍ او صنایعو خونې مسوولانو د معلوماتو له مخې، په دې زون کې شاوخوا ۱۱۰۰ ښځې د صنعت او سوداګرۍ برخو کې فعالیت لري.
