دا نندارتون د جوزجان ولایت مرکز شبرغان کې پرانستل شوی او موخه یې د کورنیو تولیداتو وده، پراختیا او بازار موندنه ده.
بله خوا، د صنعت او ســــــــوداګرۍ وزارت چارواکي بیا وايي، په شبرغان کې د دې نندارتون د پرانیستلو مـــــوخه چې درې ورځې به پرانستی وي، له کورنیو تولیداتو ملاتړ او د صنعتکارانو هڅونه ده.
دوی زیاتوي، په دې نندارتون کې پانګوالو خپل کورني تولیدات، په ۶۰ غرفو کې نندارې ته وړاندې کړي دي.
د نندارتون جوړوونکی مسعود حقمل وايي: « دا نندارتون په شبرغان ښار کې د ۳ ورځو لپاره په لار اچول شوی. په دې نندارتون کې د اوسپنې وېلي کولو فابریکو، د غذايي موادو تولیدوونکو فابریکو او د غالۍ اوبدلو فابریکو خپل محصولات نندارې ته اېښي او د هېواد له بېلابېلو ولایتونو صنعتکارانو په کې ګډون کړی.»
په ورته مهال، د جوزجان ولایت ځايي چارواکي هم د یاد نندارتون موخه د کورنیو تولیداتو ملاتړ ښیي او له پانګوالو غواړي چې د بهرنیو هېوادونو په ځای دې په کور دننه پانګونه وکړي.
چارواکي زیاتوي، په هېواد کې د پانګونې لپاره مناسب چاپېریال رامنځته شوی او اسلامي امارت د کورنیو تولیداتو د ودې او پانګوالو ته ګڼې اسانتیاوې برابرې کړې دي.
د جوزجان والي قاري ګل حیدر شفق وايي: « موږ له تاسو سره هر ډول همکاریو ته چمتو یو؛ یو بل ته به لاس ورکوو او افغانستان به په اقتصادي لحاظ په حرکت راولو.»
د جوزجان د صنعت او سوداګرۍ رییس مولوي نیاز محمد تواب وايي: « هغه سهولتونه چې په جوزجان ولایت کې صنعتکارانو ته موجود دي، ښايي په بل ولایت کې موجود نه وي. موږ په جوزجان کې دومره برېښنا لرو چې بل یو ولایت یې هم نه لري؛ همدارنګه موږ د ګازو کافي امکانات لرو چې نور ولایتونه یې نه لري.»
له بلې خوا، یو شمېر پانګوالو چې خپل تولیدات یې په دې نندارتون کې وړاندې کړي، د کورنیو تولیداتو د ملاتړ او هغو ته یې د بازار موندلو لپاره د دا ډول نندارتونونو جوړول مهم بولي.
دوی له حکومته وغوښتل چې په راتلونکي کې هم د دا ډول نندارتونونو په جوړولو سره په کوردننه د تولیداتو څخه د ملاتړ او هغوی ته د بازار موندلو زمینه برابره کړي.
د نندارتون ګډونوال عبدالمبین وايي: « دا ډول نندارتونونه زموږ د کورنیو تولیداتو د ودې لپاره ډېر ګټور دي. موږ تمه لرو چې دا ډول نندارتونونه هرکله هم جوړ شي.»
د نندارتون ګډونوال نجیب الله وايي: « د هېواد په داخل او بهر کې د دې ډول نندارتونونو جوړول د داخلي تولیداتو د ودې او دغه راز د ملي اقتصاد د ودې لپاره لپاره ډېر اړین دي.»
د نندارتون ګډونوال رحمت الله ایلچ وايي: « موږ له دولت غوښتنه کوو چې صنعتکاران حمایت کړي. له دې امله چې د افغانستان غالۍ په لاس اوبدل کېږي، هیله لرو چې وضع شوي مالیات کم شي.»
دا په داسې حال کې ده چې روان کال دا لومړی نندارتون دی چې جوزجان ولایت کې جوړېږي او ټاکل شوې په نږدې ورځو کې د کورنیو تولیداتو او لاسي صنایعو په برخه کې د ښځو لپاره هم نندارتون پرانستل شي.
کتونکي په دې باور دي چې د کورنیو تولیداتو په هڅونې او ملاتړ سره به دا ممکنه شي چې افغانستان لږترلږه د خوراکي توکو د تولیداتو له پلوه په ځان بسيا شي، خو حکومت باید د دغو تولیداتو د ودې لپاره لازمې اسانتیاوې برابرې کړي.
