د ایران چابهار ازادې اقتصادي سیمې رییس د دغه هېواد له دولتي خبري اژانس ايرنا سره په یوې ځانګړې مرکې کې د چابهار بندر له لارې د افغانستان او ایران ترمنځ د ګډو سوداګریو پر تنظیم، اسانتیاوو او زیاتوالي خبرې کړي.
د چابهار ازادې اقتصادي سیمې یا « فري زون » رییس محمد سعید اربابي په دغې مرکه کې چابهار د افغانستان لپاره د سوداګرۍ تر ټولو نږدې او ګټوره ټرانزیټي لار بللې.
د نوموړي په خبره دواړه لوريو هوکړه کړې چې د چابهار له لارې د سوداګرۍ د لا ښهوالي او ننګونو حل په موخه به د څار یوه کمېټه جوړه کړي.
د چابهار ازادې اقتصادي سیمې رییس محمد سعید اربابي وايي: « په چابهار بندر کې د پانګونې او لوجيستیکي همکارۍ لپاره اړین ګامونه اخیستل شوي او چابهار بندر د افغانستان لپاره د سوداګرۍ تر ټولو نږدې لاره بلل کېږي، چې پرانیستو اوبو ته مستقیم لاسرسی پکې موجود دی. »
ورته مهال په ایران کې د اسلامي امارت سفارت د یوې خبرپاڼې په خپرولو سره ویلي په تهران کې د افغانستان سفیر فضل محمد حقاني د چابهار ازادې اقتصادې سیمې له رییس محمد سعید اربابي سره د سوداګریزو اړیکو په پراختیا، د دغې سیمې د ظرفیتونو په اغېزناکې کارونې او د نورو سوداګریزو اسانتیاوو په رامنځته کېدو خبرې شوي.
په ایران کې د افغانستان سفارت خبرپاڼه کې راغلي: «په تهران کې د افغانستان اسلامي امارت سفیر فضل محمد حقاني د چابهار ازادې اقتصادي سیمې له رییس او اجراییوي مدیر محمد سعید اربابي په رسمي بلنه له چابهار بندر څخه کتنه لرله په دغې کتنه کې د سوداګریزو اړیکو په پراختیا، د دغې سیمې د ظرفیتونو په اغېزناکې کارونې، د صادراتو لپاره د اسانتیاوو پر چمتووالي او د ګډو سوداګریو پر زیاتولو خبرې کړې.»
د اقتصادي چارو شنونکي د چابهار موقعیت ته په اشارې دغه بندر له سیمې او په ځانګړې ډول له ایران سره د سوداګرۍ په برخه کې یوه مهمه ټرانزیټي لار بولي. د دوی په خبره، په اقتصادي پرمختګونو او سیمهيیز اتصال کې چابهار مهم نقش لري چې د سیمې په کچه د سوداګرۍ یو ستراتیژیک موقعیت یادېږي.
د اقتصادي چارو شنونکی صادق حمیدزوی وايي: « چابهار لاره د افغانستان لپاره مثمره تمامه شوې ده، افغان صنعتکارانو وکولای شول چې د پاکستان له اقتصادي فشار څخه د دغې لارې پوسیله خپلې اړتیاوې پوره کړي او هېڅکله هم یو فشار ته مجبور نشي.»
د چابهار له لارې افغانستان هند او د سوېلي او ختيځې اسيا ځينو هېوادونو په ګډون اروپا ته صادرات کوي. دغه لار د پاکستان ګوادر او کراچۍ بندرونو پرتله لنډه او د لګښت له پلوه ارزانه ښودل شوې.
