کندهار کې د هېواد په کچه تر ټولو سترې نساجۍ فابریکې د جوړولو چارې روانې دي، هغه فابریکه چې ټاکل شوې د لومړي ځل لپاره د افغانستان د ټوکر اړتیا په کور دننه پوره کړي.
د کندهار د سوداګرۍ او پانګونې خونې مسوولان وايي، افغانستان تر دې دمه د اړتیا وړ ټوکر له نورو هېوادونو واردوې، خو د دې فابریکې په فعالېدو سره به هم کورنۍ اړتیا پوره شي او هم به د افغانستان ټوکر ته د صادراتو زمینه برابره شي.
د کندهار د سوداګرۍ او پانګونې خونې مرستیال عبدالباقي بینا وايي: « دا فابریکه به په ډېر لږ وخت کې خپل تولیدات پيل کړي، لومړی به موږ خپله ځان بسیا شو او بیا به یې تولیدات نورو هېوادونو ته صادر شي. موږ امید لرو چې راتلونکي کې به د اوسنیو وارداتو په اندازه به صادرات ولرو. ښه خبره دا ده چې د دې فابریکې خام مواد چې عبارت له پنبې څخه دي، له موږ سره شته او د افغانستان پنبه د آسیا په کچه غوره پنبه ده.»
د سندس نساجۍ فابریکه د ۶۰ میلیونه امریکايي ډالرو په لګښت، د کندهار د عینو مېنې ښارګوټي په ۶۰ جریبه ځمکه کې جوړیږي او تر اوسه یې د جوړېدو چارو ۸۵ سلنه پرمخ تللې دي.
د فابریکې مسوولان وايي، دا فابریکه په دوو پړاوونو کې فعالېږي چې په لومړي پړاو کې د ورځې ۵۰ زره مترمربع ټوکر د تولید او رنګولو ظرفیت لري او په دویم پړاو کې به یې تولیدات نور هم زیات شي.
د سندس نساجۍ فابریکې ویاند رحمت رشید وايي: « د دې فابریکې ساختماني چارې د ۲۰۲۳ کال له پیل سره پيل شوې او تر اوسه ۸۵ سلنه ودانیزې او د ماشینرۍ تدارکاتي چارې بشپړې شوې دي. د لومړي فاز په فعالېدو سره به په ۲۴ ساعتونو کې ۵۰ زره متره ټوکر تولید او رنګ کړي. په دې فابریکه کې به ۹۰۰ تنه کار کوي؛ دا به نه یوازې د افغانستان مارکېټ ته ټوکر وړاندې کړي بلکې ټولو آسیايي هېوادونو او په ځانګړې توګه دوبۍ کې به د دې فابریکې تولیدي ټوکر وړاندې کېږي.»
له بلې خوا، هغه کسان چې په دې فابریکه کې پر کار بوخت دي، د بېکارۍ د مخنیوي او کورنیو تولیداتو د ډېرېدو لپاره د ورته پانګونو پر زیاتوالي ټینګار کوي.
د فابریکې کارکوونکی عبدالاحمد وايي: « د دې فابریکې ټول مواد زموږ خپل دي. پنبه به زموږ له خپلو ځمکو راځي او دلته به په ټوکر بدلېږي.»
د فابریکې یو بل کارکوونکی عبدالواسع وايي: « موږ ډېر خوښ یو چې دلته د ټوکرانو کارخانه جوړېږي. زه له نورو پانګوالو هم غواړم چې دا ډول کارخانې جوړې کړي.»
کارکوونکی جاوید احمد وايي: « دوه دوه نیم کاله کېږي چې دلته په کار بوخت یم، خدای دې وکړي دا ډول نورې کارخانې هم جوړې شي، ترڅو هېواد پرمختګ وکړي.»
د یادونې وړ ده چې دا مهال ټوکر او نخي توکي په ډېره اندازه افغانستان ته را واردېږي، خو تمې شته چې دې او ورته نورو کارخونو په فعالېدو سره به دا اړتیا هم پوره او تولیدات به یې نورو هېوادونو ته صادر شي.
