افغاني غالۍ د لوړ کیفیت، ښه رنګ او غوره نوم له کبله په نړیوال بازار کې ځانګړی ځای لري او د هېواد په یو شمېر ولایتونو کې دغه برخه کې پانګونې هم شوې دي.
د فاریاب په اندخوی ولسوالۍ کې د افغانۍ غالیو اوبدلو یوه کارخونه کې دا مهال لسګونه کسان په کار بوخت دي.
د دې ولسوالۍ سوداګرۍ او پانګونې خونې مسوولین وروستیو کې د وطني غالیو صادرات تر پخوا ښه بولي او وايي، د روان لمریز کال له پیل راهیسې یوازې له اندخوی ولسوالۍ څخه د اقینې بندر له لارې د ۱۰۰ زره امریکايې ډالرو په ارزښت غالۍ صادرې شوې دي.
د اندخوی ولسوالۍ د پانګونې او سوداګرۍ خونې مدیر ابراهیم یلداش وايي: « په یوه کال کې مو له ۱۵۰ موټرو ډېرې غالۍ چې ارزښت یې له ۱۰۰ زره امریکايي ډالرو پورته کېږي، یوازې د اندخوی له سوداګرۍ خونې صادرې کړې دي.»
په ورته مهال، د غالۍ اوبدنې برخه د کارخونو مسوولین هم مني چې د دې کورني تولید بازار غوړېدلی، خو د خامو موادو د واردولو په برخه کې د ستونزو د حل غوښتنه کوي.
د غالۍ اوبدلو کارخونې مسوول محمد شفیق وايي: « الحمدالله په ځانګړې توګه اندخوی کې د سوداګرۍ او تجارت زمینه برابره شوې او د افغانستان غالۍ د پاکستان په ځای خپله د افغانستان له لارې صادرېږي. د افغانستان غالیو په بهر کې خپل ارزښت ساتلی او موږ کوښښ کوو چې نور هم کارونه ښه شي.»
په همدې حال کې د کارخونو غالۍ اوبدونکي د ورته پانګونو د ډېروالي غوښتنه کوي او وايي، که دا ډول پانګونې لا ډېر شي، د بې روزګارۍ ګراف به راټیټ شي.
غالۍ اوبدونکی عبدالله وايي: « زه ډېرخوشاله یم چې دلته کار کوم، د ایران او پاکستان له مهاجرتونو خلاص شوم.»
غالۍ اوبدونکی حسیب الله وايي: « موږ په خپل کار کې ستونزه نه لرو او ډېر خوښ یم چې خپل هېواد کې کار لرم. له نورو مسافرو هم غواړم چې راشي او خپل وطن کې کار وکړي.»
غالۍ، ګیلم، شړۍ، لمڅی، چپنې او دودیزې جامې د شمال خلکو په ځانګړې توګه د فاریاب اندخوی ولسوالۍ هغه لاسي تولیدات دي چې په کور دننه او بهر خاص نوم او ګڼ پېرودونکي لري.
