د صنعت او سوداګرۍ وزارت چارواکو د یاد وزارت د وزیر پر مشرۍ د هېواد د صادراتي مرکزونو د مسوولینو او وزارت د نورو اړوند چارواکو ترمنځ د لومړنۍ مشورتي انلاین ناستې خبر ورکړی.
د دې وزارت ویاند وایي، په ناسته کې نورالدین عزیزي د عوایدو د شفافې راټولونې مکانېزم د پلي کېدو، د تصدیق پاڼو د وېش او د صورت حساب یا انوایسونو د ثبت پر اهمیت د ټینګار ترڅنګ، د صادراتي مرکزونو ترمنځ همغږي، د سوداګریزو راکړه ورکړو ډیجیټلي کول او د صادراتي چارو جامع سازي د وزارت له مهمو لومړیتوبونو بللي.
عبدالسلام جواد وایي، د صادراتي مرکزونو له پرانیستې او د وزارت د شمېرو له مخې، د ۱۴۰۴ هـجري لمریز کال له زمري میاشتې راهیسې ګاونډیو هېوادونو ته د افغانستان صادرات د تېر کال د همدې مودې په پرتله له ۴۰ سلنه ډېر شوي.
جواد په دې اړه وايي: « د صادراتي مرکزونو د پرانیستنې او د افغانستان د سوداګریز وضعیت د تحلیل له مخې، شمېرې ښيي چې د ۱۴۰۴ کال په زمري میاشت کې د ۱۴۰۳ کال د همدې میاشتې په پرتله، د هېواد صادرات ۴۳ سلنه لوړ شوي او دا هغه لاسته راوړنې دي چې د افغانستان د صادراتي ودې ښکارندويي کوي. د صنعت او سوداګرۍ وزارت ژمنه کوي چې د سالم مدیریت، هدفي پالیسۍ جوړونې او له ملي ظرفیتونو د اغېزناکې ګټې اخیستنې له لارې، د هېواد صادراتي پروسه لا ډېره پياوړې کړي.»
په ورته مهال، د اقتصادي چارو کارپوهان دا ډول ناستې د هېواد د اقتصادي ودې، داخلي عوایدو د زیاتوالي، بهرنیو اسعارو پر وړاندې د افغانۍ پولي ارزښت د لوړېدو او د کورنیو توکو د کیفیت د پیاوړتیا له پلوه ارزښتناک او مهم ګڼي.
د اقتصادي چارو شنونکی سېد مسعود وايي: « هغه ناسته چې په حقیقت کې یوه داسې مرجع چې تل پالیسي جوړونکې ده او هغه مرجع چې په حقیقت کې د صادراتو او وارداتو او تولیدي مسایلو تطبیق کوونکې ده، زه فکر کوم که په دې برخه کې همغږي رامنځته شي او له شرایطو سره سمې پالیسۍ منځته راشي، هم به د دولت عواید ورسره لوړ شي او هم به زموږ د سوداګرو او صنعتګرو رقابتي قدرت ډېر شي؛ بله دا چې زموږ لپاره به هغه اندازه هم تعیین شي چې څومره تولیدات او صادرات لرو.»
په همدې حال کې یو شمېر نور اقتصادي شنونکي بیا باور لري چې د هېواد صادراتي توکو کې د روڼتیا راوستل، د هېواد اقتصادي ودې او له نړیوالو هېوادونو سره د رغنده سوداګریزو او اقتصادي اړیکو رامنځته کولو کې مهم رول لوبولی شي.
شنونکي له اسلامي امارته غواړي چې د افغانستان د توکو د صادراتو لپاره اغېزمن ټرانزیټي مسیرونه برابر کړي، څو په اسانۍ سره نړیوالو بازارونو ته ورسېږي.
د اقتصادي چارو شنونکی یونس ځدراڼ وايي: « د صادراتو په برخه کې چې هرڅومره ډېر شفافیت رامنځته شي، دا زموږ په اقتصاد کې مثبت بدلون راولي. په لومړي سر کې باید هغو لارو ته چې زموږ توکي نړۍ ته لېږدوي، لکه چابهار بندر ته باید پاملرنه وشي؛ ترڅو موږ له کوم خنډ پرته په لږ وخت کې خپل توکي د نړۍ بازارونو ته ورسوو.»
د راپورونو پر بنسټ، تېر کال افغانستان د شاوخوا ۱۳ میلیارده ډالرو په ارزښت سوداګریزه راکړه ورکړه درلوده چې له دې ډلې یو میلیارد او ۷۸۵ میلیونه ډالره صادرات او ۱۱ میلیارده او ۱۶۴ میلیونه ډالره واردات و.
د افغانستان ډېری صادراتي توکي پاکستان، هند، متحده عربي امارات، تاجیکستان، ایران، اوزبېکستان، ترکیې، عراق، چین او قزاقستان ته صادرېږي.
