د کابل ښار په بادام باغ سیمه کې د بزګر ميلې په وياړ د مالدارۍ او کرنیزو تولیداتو ۳۲ نندارتون پرانیستل شوی او خلک د کورنیو تولیداتو د لیدنې لپاره ورځي.
په دې نندارتون کې غرفه لرونکي صنعتکاران او متشبثان وايي، د کورنیو تولیداتو د ودې لپاره د ورته نندارتونونو جوړول مهم دي او په تېرو درېيو ورځو کې یې له ګڼ شمېر سوداګرو سره هوکړې لاس لیک کړې دي.
دوی زیاتوي، د داخلي صنعتي تولیداتو په برخه کې یې له بېلابېلو شرکتونو فرمایشونه هم ترلاسه کړي دي.
د نندارتون ګډونوال توحید وايي: « نن درېیمه ورځ ده؛ نندارتون ښه روان دی، خلک راځي، ګوري او خوښوي یې. له ماسره لاسي صنایع دي او غواړم هېوادوالو ته ښکاره کړم چې موږ هم استعداد لرو.»
د نندارتونو ګډونواله زهرا سلطاني وايي: « موږ له یوه شرکت سره د خپلو محصولاتو قرارداد کوو، دا موږ ته ډېره ګټه لري. د خدای فضل دی په تېرو ورځو کې مې ښه فروشات لرل.»
د کابل اوسېدونکی احمد طاهر وايي: « زه وایم هر ولایت کې باید نندارتون خپل ځای ولري. باید دولت یو دایمي ځان مشخص کړي، ترڅو هر کله په کې نندارتونه جوړ شي، زما په نظر هره اوونۍ باید جوړ شي، ترڅو داخلي تولیداتو ته تبلیغ وشي.»
په ورته مهال، د نندارتون جوړونکي له خلکو غوښتنه کوي چې باید د هېواد کورنیو تولیداتو لیدنې او د سوداګرو هڅونې لپاره له جوړو شویو نندارتونونو لیدنه وکړي.
د کرنې او مالدارۍ خونې مرستیال میرویس حاجي زاده وايي: « د افغانستان په هرګوټ، ولسوالۍ او ولایت کې که نندارتون جوړېږي، خلک باید د هغه هرکلی وکړي، لیدنه ترې وکړي او څه نا څه خرید هم وکړي؛ ترڅو هغه تولیدوونکي چې له بدخشان، خوست، کونړ او نورو لرې ولایتونو راځي، یوه ګټه او عاید هم په لاس ورشي. دا نندارتون ښه و، ډېر خلک راغلل،خو زموږ توقع له دې هم ډېره وه.»
چارواکي بیا د خلکو د لېوالتیا خبره کوي او وایي، په تېرو درېیو ورځو کې د مالدارۍ او کرنیزو تولیداتو له جوړ شوي نندارتون زرګونه عامو خلکو او سلګونه سوداګرو چې د کورنیو تولیداتو په پېر او پلور کې لاس لري، لیدنه کړې.
د کرنې وزارت د چارواکو په خبره، هڅه کېږي چې د مالدارۍ او په تېره بیا د کرنیزو محصولاتو او کورنیو تولیداتو د ودې لپاره د هېواد په بېلا بېلو سیمو کې ورته نندارتونه جوړ کړي.
