روسیه وایي، چمتو ده چې د افغانستان او پاکستان ترمنځ ناندریزه فضا په سوله ییزې بڼې بدله کړي.
په اسلام اباد کې د روسیې سفیر ویلي، که دواړه خواوې وغواړي، روسیه چمتو ده چې د افغانستان او پاکستان ترمنځ داسې منځګړيتوب وکړي چې جګړیزه فضا ورسره بدله شي.
البرټ خاوریف دغه څرګندونې له سپوتنیک آژانس سره په یوې ځانګړې مرکه کړې.
خاوریف په دې اړه ویلي: « د کابل او اسلام اباد ترمنځ روانو ناندریو ته په کتو، روسیه چمتو ده چې د حل لپاره منځګړيتوب وکړي؛ خو دا وړاندیز هغه وخت عملي کېدای شي چې دواړه خواوې یې وغواړي. تاسې پوهیږئ چې د افغانستان او پاکستان ترمنځ د ستونزو حل لپاره د مسکو فارمټ تر ټولو غوره انتخاب دی.»
د روسیې سفیر همدارنګه زیاته کړې چې د افغانستان او پاکستان ترمنځ جګړې او ستونزې کولی شي په ټوله سیمه منفي اغېز ولري.
د هغه په خبره، روسیه له کلونو راهیسې هڅه کوي چې سیمه له ناوړو پایلو او اغېزو خوندي وساتي.
که څه هم د اسلامي امارت چارواکي د روسیې تازه اندېښنو او وړاندیز په اړه څه نه وایي، خو د سیاسي چارو شنونکي بیا په دې باور دي چې روسیه کولی شي د افغانستان او پاکستان ترمنځ مثبتو اړیکو ته لاره هواره کړي.
د سیاسي چارو شنونکی شهسوار سنګروال وايي: « په هر حال، موږ په دې اړه بدبین نه یو، که چېرې د دې روغې جوړې امکانات وي، ولې نه! ډېر به ښه شي. په دې وروستیو کې موږ ګورو چې د تورخم لاره بنده ده او دواړو غاړو ته پراتو ولسونو ډېر زیان ولیده. که چېرې دا ډول روغه کېږي، دا به ډېر ښه شي.»
ځینې نور بیا وایي، د کابل او اسلام اباد ترمنځ مثبتې اړیکې د سیمې په روانو چارو هم مثبته اغېزه لري.
د دوی په باور، د کابل او اسلام اباد ترینګلې اړیکې په سیمه کې د هېڅ لوري پر ګټه نه دي.
د سیاسي چارو شنونکی نجیب الرحمن شمال وايي: « تورخم د افغانستان او پاکستان ترمنځ ډېر مهم تجارتي بندر دی. له دې بندر نه یوازې د افغانستان او پاکستان تجارتي اموال صادرېږي، بلکې د مرکزي آسیا تجارتي توکي هم د پراختیا په حال کې دي او غواړي د سوېلي آسیا له هېوادونو سره سوداګري ډېره کړي. په داسې حال کې چې د منځنۍ آسیا هېوادونه له یوې خوا د افغانستان له لارې سوېلي آسیا سره سوداګري غواړي، له بلې خوا روسیې سره هم اړیکې او سوداګري لري. د تورخم لارې بند پاتې کېدل نه یوازې افغانستان او پاکستان ته زیان اړوي بلکې د منځنۍ آسیا هېوادونو او حتا روسیې ته هم زیان اړولی شي.»
په اسلام اباد کې د روسیې سفیر دغه وړاندیز داسې مهال کوي چې له تېرې فبرورۍ میاشتې د مارچ تر ۱۰ نیټې د اسلامي امارت پوله ساتو او پاکستاني ځواکونو د ډیورنډ فرضي کرښې په اوږدو کې څو ځلې سختې نښتې وکړې او له ځاني زیانونو سربیره یې د دواړو خواوو سوداګرو ته مالي زیانونه هم واړول.
