د ایران ولسمشر: ټرمپ باید د قاسم سلیماني وژلو په تور محاکمه شي

د ایران ولسمشر ابراهیم رئیسي  د دوشنبې پر ورځ د « ۱۴۰۰ کال د مرغومې پر ۱۳ مه» یوې ناسته کې د وینا پر مهال وویل، دوه کاله وړاندې د دوی پیاوړی جنرال قاسم سلیماني  د امریکا پخواني ولسمشر ډونالډ ټرمپ په امر ووژل شو.

رئیسي  وايي، د سلیماني اصلي قاتل ډونالډ ټرمپ دی او هغه باید قصاص شي.

هغه زیاته کړه،چې یوه بې طرفه محکمه باید جوړه شي،چې ټرمپ، پخوانی  د بهرنیو چارو وزیر مایک پامپیو او نور امریکايي چارواکي په کې د قانون پریکړې ته راوبلل شي.

هغه ګواښ وکړ، که داسې و نه شي،نو امریکا دې د غچ اخیستنې لپاره چمتو اوسي.

ابراهیم رئیسي دا خبرې داسې مهال کوي،چې پرون د سپاه پاسداران د پیاوړي او مشهور جنرال قاسم سلیماني د وژل کیدو دوه کلونه پوره شول.