د طالبانو لاس ته د بلخ ولايت د ۷ ولسواليو له لوېدو وروسته د جمعيت ګوند مشر عطامحمد نور بلخ ته رسېدلی او ويلي يې دي،چې د سيمو د بيا نيولو عمليات به پيل کړي.
نوموړی وايي، په هر ډول حالت کې به له هېواد او خپلو خلکو دفاع کوي.
نور د هېواد په ګوټ ګوټ کې پر خپلو قوماندانو غږ وکړ،چې د جګړې کرښې ته ستانه شي او د امنيتي ځواکونو تر ځنګ ودرېږي.
د جمعيت ګوند مشر پر طالبانو غږ وکړ،چې سوله وکړي او په خبره یې، د جګړې له لارې بريا ته نه شي رسېدلی.
د جمعيت ګوند مشر وويل چې د هيواد يو شمېر ولسوالۍ د ناسم مديريت له امله سقوط شوي دي.
د هغه په خبره موخه يې يوازې د بلخ او شمال تصفيه نه ده،بلکې غواړي ټول هېواد کې به خلک وهڅوي،چې د امنيتي ځواکونو تر څنګ ودرېږي.
دغه راز هغه له حکومته هم وغوښتل،چې ولسي حرکتونو ته دې امکانات ورکړي.
طالبانو تر دې مهاله د عطامحمد نور څرګندونو ته غبرګون نه دی ښودلی.