د افغانستان د بهرنیو چارو وزارت وایي، پاکستان دې طالبان سولې ته وهڅوي، ځکه دغه هېواد پر طالبانو نفوذ او کنټرول لري.
د بهرنیو چارو وزارت د یوې اعلامیې په خپرولو سره ویلي، له پاکستاني چارواکو څخه د افغانستان او نړیوالې ټولنې غوښتنه دا ده، چې له خپل هغه نفوذ او کنټرول څخه، چې پر طالبانو یې لري، کار واخلي او طالبان اوربند، د تاوتریخوالي کمولو او دسولې خبرو بیا پیل ته وهڅوي.
یاد وزارت ویلي، که پاکستان طالبان وهڅوي، چې ستونزه د خبرو له لارې حل کړي، نو افغانستان کې به جګړه ختمه، د وینې توییدل ختم او نړیوال تروریزم به پای ته ورسېږي.
د بهرنیو چارو وزارت د افغانستان په اړه د پاکستان د بهرنیو چارو وزارت هغه څرګندونې هم له حقیقت لرې بللي، چې ویلي یې دي نړیوالې ټولنې د افغان سولې په خبرو کې د پاکستان رول په پراخه توګه منلی دی.