د ملي روغې جوړې عالي شورا مشر عبدالله عبدالله له خپل پاکستاني سیال شاه محمود قریشي سره په ترکیه کې د انتالیا ناستې په څنډه کې لېدنه کړې.
عبدالله عبدالله وایي، قریشي منلې،چې د سیمې لپاره یې سیاست تغیر کړی او د افغان ټیکاو سره مرسته کوي.
عبدالله او قریشي د افغانستان او پاکستان په دوه اړخیزو اړیکو، سولې بهیر او نورو مهمو مسایلو په هکله خبرې او بحثونه کړي دي.
عبدالله زیاته کړه:« د پاکستان د بهرنیو چارو وزیر شاه محمود قریشي سره مې د انتالیا په څنډه کې، په سولې پروسې او دوه اړخیزو اړیکو نظریات تبادله کړل. قریشي راته د افغان سولې پروسې، د مذاکراتو چټکتیا او افغانستان کې د ثبات په تړاو د بشپړ ملاتړ ډاډ راکړ.»
په همدې حال کې د پاکستان د بهرنیو چارو وزیر شاه محمود قریشي ویلي، عبدالله سره په لیدنه کې مې د افغانستان اړوند خپله پالیسي تائید کړې.
قریشي ویلي: « ډاکټر عبدالله عبدالله سره مې لېدنه کې د افغانستان سیاسي مشرتابه سره زموږ د ښکېلتیا پالیسي یو ځل بیا تاید کړه، ترڅو د دوه اړخېزو اړېکو او سولې پروسې په اړه ژور دوه اړخېز تفاهم رامنځته کړو. د دایمې سولې لپاره مې د مذاکراتو د چټکتیا هېله وښوده.»
د ملي روغې جوړې عالي شورا په یوه خبرپاڼه کې ویلي، په دې ناسته کې د پاکستان بهرنیو چارو وزارت د افغانستان ثبات د سیمې ثبات بللی دی.
د ملي روغې جوړې عالي شورا د خبرپاڼې یوه برخه: « په دې ناسته کې شاه محمود قریشي ټېنګار وکړ، چې په سیمه کې د پاکستان سیاست بدلون کړی، پاکستان په سیمه کې د اقتصادي اتصال د پراختیا محور څاري او د دې نظر د تحقق لپاره په افغانستان کې سوله او ثبات ضروري دی.»
د ملي روغې جوړې عالي شورا ویلي، عبدالله سره په لیدنه کې قریشي په افغانستان کې د سولې ټنګښت په برخه کې د پاکستان په هڅو او دوامداره همکاریو ټینګار کړی او افغانستان کې ټيکاو یې د پاکستان په ګټه هم بللی دی.