د بلخ ولایت په مرکز مزارشریف کې یو شمېر روغتیاپالان وايي، د کورونا ویا او د جګړې له وېرې د خلکو روان ځپل شوی، چې له همدې اړخه د زيانمنو کورنيو غړي په رواني ناروغيو هم اخته شوي دي.
دوی له خلکو غواړي،چې د کورونا وبا مخنيوي برخه کې روغتیايي لارښوونې مراعت او وېرې او اضطراب ته دې نه تسليم کېږي.
د بلخ عامي روغتیا ریاست د رواني درملنې څانګې مسوول اسدالله الفت وايي: « خلک ترڅو چې ډېر اړ نه شي او رواني ناروغۍ یې ډېره سخته شوي نه وي،روغتونونو او کلینیکونو ته مراجعه نه کوي. »
بل لامل چې بلخ کې د رواني ناروغۍ د ډېرېدو برخه کې ورته ګوته نيول کېږي، د جګړو، چاودنو او بريدونو زياتوالی دی.
د بلخ د ملکي روغتون روغتیاپالان وايي، زيات شمېر خلک د جګړې، فقر او بېکارۍ له امله هم له رواني ناروغيو سره مخ دي.
د ملکي روغتون چارسنبال شفیق شایق وايي: « جګړې، فقر، بېکاري د خلکو پر روان زیات اغېز کوي. همدا لاملونه دي،چې پر رواني ناروغیو اخته کېږي. »
بل پلو بیا ځايي خلک غوښتنه کوي، چې له کورونا وبا سره د ګټورې مبارزې لپاره بايد ښکېل اړخونه هېواد کې روانه جګړه پای ته ورسوي.
د مزار شریف اوسېدونکی وحید الله وايي: « هېله مو دا ده، چې په هېواد کې سوله راشي او جګړې ته د پای ټکی کېښودل شي، ترڅو د خلکو فکرونه ارامه شي. »
بلخ کې په داسې مهال د رواني ناروغۍ ډېرېدو په تړاو اندېښنې زياتې شوي، چې دمګړی د دغه ولايت په يو شمېر ولسواليو کې سختې جګړې روانې دي او تر څنګ يې خلک کورونا وبا هم ځپلي دي.
